داليا أبو عمر: الذوق العام يُدهَس تحت أقدام "التريند"
هاجمت الإعلامية داليا أبو عمر ما وصفته بـ"النخبة المصنّعة" التي تتصدر المشهد بفعل السوشيال ميديا، لا بالموهبة أو الثقافة، معتبرة أن الغلبة أصبحت في زمننا لمن يركب موجة التريند لا لمن يملك قيمة حقيقية.
وقالت داليا أبو عمر في تغريدة نشرتها عبر حسابها الرسمي على منصة "إكس": "النخبة المُصنّعة وورطه الذوق العام.. بقينا في زمن الغلبة فيه مش للموهبة، ولا للثقافة، ولا حتى للناس اللي تعبت على نفسها وبنت اسمها بالطوب طوبة. بقينا في زمن التريند، واللي يركب التريند هو اللي بيتصدر، حتى لو معندوش حاجة حقيقية يقولها ولا يقدّمها".
داليا أبو عمر: "نخبة اللايكات" تصدّرت والمثقفون في الظل
وأضافت: "كل يوم بنصحى على “نخبة” جديدة.. بس الحقيقة؟ دي مش نخبة، دي فئة متصنعة، اتجمعت حوالين لايكات وسوشيال ميديا و”إفيه طلع في فيديو”. ناس مش شرط تكون مثقفة، ولا موهوبة، بس عندهم قدرة خارقة على جذب الانتباه بأي شكل، حتى لو على حساب القيمة، وحتى لو بالتفاهة أو الابتذال.. اللي بيحصل ده مأساة مش بس على مستوى المحتوى اللي بيتقدّم، لكن كمان على مستوى الذوق العام نفسه. لأن الناس، بحكم التكرار، بتتعود. ولما تتعود، بتنسى الفرق بين الغث والثمين، بين اللي يستحق واللي بيستغل".
وتابعت: "وهنا الكارثة: إحنا بقينا بنطبع مع السطحية، وبنحتفل بالابتذال، وبنهمّش أي حاجة فيها عمق أو معنى، لأنها مش “لايقة” على خفة التريند.. النهاردة، تلاقي واحد بيغني أغنية مافيهاش جملة مفيدة، ولا صوت، ولا لحن، ومع ذلك مكسر الدنيا، وبيطلع في كل البرامج. وتلاقي مثقف حقيقي أو فنان موهوب بيتكلم كلام تقيل ومحترم، ما حدش سامع عنه، ولا حد عايز يديه فرصة.. طب ليه؟ لأننا سايبين الساحة فاضية للهوّاة، واللي صوتهم أعلى مش لأنهم أحسن، لكن لأنهم أقرب للناس في البساطة المبتذلة، أو لأن السوشيال ميديا خدتهم فوق بالعافية".
واختتمت الإعلامية داليا أبو عمر تغريدتها قائلة: "إحنا في حاجة ماسّة نراجع نفسنا كمجتمع.. نراجع إحنا بنكرّم مين وبنهمّش مين؟ بنحتفل بإيه وبنضحك على إيه؟ مين اللي بيمثّلنا في الإعلام؟ مين اللي بقينا بنشوفه “قدوة” لمجرد إنه بيطلع لايف كل يوم ويتكلم في أي حاجة؟ الذوق العام مش حاجة بتيجي من فراغ.الذوق بيتشكل من اللي بنشوفه، وبنسمعه، وبنتفاعل معاه.. ولو فضّلنا ندوّي الفراغ، هنصحى نلاقي نفسنا في صحراء فنية وفكرية، مفيهاش غير صدى الكلام الفاضي. النجومية مش تريند والتأثير مش بعدد الفولورز.. والقيمة مش في اللي يضحك الناس، لكن في اللي يسيب أثر بجد.. وساعتها بس، لما نرجّع القيمة لمكانها، نقدر نقول إن الذوق العام ابتدى يتعدل".
