"دعاية سلبية".. محلل سياسي ينتقد التهويل بعد حريق سنترال رمسيس
هاجم الإعلامي والمحلل السياسي لؤي الخطيب، حملات التهويل التي تصدرت مواقع التواصل عقب حريق سنترال رمسيس، مؤكدًا أن ما تم ترويجه عن "انهيار الاتصالات وشلل الإنترنت" لا يعكس الحقيقة، ويُشكّل دعاية سلبية تضر بصورة الدولة داخليًا وخارجيًا.
وقال الخطيب، في تغريدة له عبر حسابه الرسمي على منصة "إكس": "مع اعتذاري طبعا للنكت والضحك، وللخبرات العريضة اللي ظهرت فجأة في الاتصالات والشبكات والأمن القومي وكده.. بس الحقيقة إن كل اللي اتكتب عن انهيار شبكة الإنترنت، أو إن مصر بقت معزولة وخدماتها انهارت بسبب "مبنى"، هو نموذج للدعاية السلبية اللي ممكن تشوه صورة بلد وهي أصلا مش حقيقية!"
وأضاف: "الواقع بيقول إن مفيش انهيار كامل ولا شامل حصل للاتصالات أو الإنترنت الأرضي أو المحمول، ولا انهيار كامل وشامل حصل للخدمات المصرفية أو أي مرافق.. اللي حصل هو تأثر نسبي في بعض المناطق خصوصا القاهرة الكبرى، ومصر مش القاهرة الكبرى بس، وتأثر نسبي يعني مش انهيار كامل.. دي نتيجة طبيعية جدا لحالة طوارئ أي دولة معرضة ليها، ومش معناها خالص إن البلد كلها متوصلة بمبنى واحد، لإن ببساطة مش كل البلد اتعزلت زي ما اتقال، اللي اتأثر هو الخدمات المتصلة بالمبنى ده، ولو المبنى اتحرق وكل حاجة كانت زي الفل يبقى مالوش لازمة أصلا! طيب الباك أب والاحتياطي والمسارات البديلة؟ عزيزي، انت حاليا متصل بالإنترنت والخدمات بترجع تدريجيا، عايز ايه دليل أكتر من كده على إن في باك أب بدأ يشتغل فعلا؟".
وأكمل الإعلامي والمحلل السياسي لؤي الخطيب: "الدعاية السلبية اللي احنا شاركنا فيها بتضر الاستثمار وبتضر السياحة وبتضر بصورة مصر في عالم مابيتعاملش مع الاتصالات كرفاهية، وكل ده حصل بكلام جزء كبير منه أكاذيب اتقالت بحسن نية أو بخفة دم.. وكده كده حادثة زي دي لازم هيبقى بعدها تحقيقات، لو ثبت إن في مشكلة هتتعالج، ولو حد مقصر هيتحاسب، لكن بلاش احنا نتطوع بالتقطيع في نفسنا!".
لؤي الخطيب: حريق سنترال رمسيس لم يعزل مصر
كان قد أشاد الإعلامي والمحلل السياسي لؤي الخطيب، بكفاءة التعامل مع حريق سنترال رمسيس، مؤكدًا أن ما حدث هو حالة طوارئ وطنية تعاملت معها الأجهزة المختصة بسرعة وفعالية، مشددًا على أن مثل هذه الأزمات قد تحدث في أي دولة.
وقال الخطيب، في تغريدة له عبر حسابه الرسمي على منصة "إكس": "مفيش دولة معصومة من التعرض لحالة طوارئ وطنية، وبعيدا عن الهزار والنكت، فحتى الآن احنا قدام تعامل جيد جدا مع حالة طوارئ مش قليلة.. المطافي والإسعاف بيتعاملوا مع الحادث، بفضل الله ماعندناش وفيات.. إصابات فقط، في بدايل اتوفرت للوصول لخدمة زي الإسعاف وتم الإعلان عنها بشكل فوري، وبيتم حاليا استعادة الخدمات المتأثرة تدريجيا".
