نسرين إمام تدافع عن مها الصغير: "اللي بيغلط مش تريند ده بني آدم موجوع"
انفجرت الفنانة نسرين إمام غضبًا من حملات التشهير التي طالت الإعلامية مها الصغير مؤخرًا، مؤكدة أن ما تتعرض له ليس محاسبة بل "جلد علني" واستباحة إنسانية لا تليق، وأن المجتمعات التي تستقوي على الضعيف لا تتعافى أبدًا.
وقالت نسرين عبر استوريهات مؤثرة نشرتها على حسابها بـموقع تبادل الصور والفيديوهات "إنستجرام": "كفاية جلد في الناس.. بجد كفاية في حد غلط، آه.. قال أو عمل حاجة مش مظبوطة يمكن اندفع، يمكن تلخبط، يمكن كان بيحاول يثبت نفسه بأي طريقة.. بس هل ده مبرر إننا نهد بني آدم بالشكل ده؟ مشكلتنا إننا بنفتكر إننا حكام على الناس نحكم، وندين، ونهاجم، وننسى إننا بشر زيهم، وإن كلنا معرضين نغلط، وكلنا عندنا لحظات ضعف ممكن تخلينا نتصرف تصرف مش محسوب.. اللي بيغلط يتحاسب؟ أكيد. بس الحساب مش بالتشهير، ولا بالشماتة، ولا بإنك تزود النار، وتستمتع بصوت الوجع.. اللي وقع مش محتاج تدوس عليه..يمكن يكون وقع وهو أصلا موجوع، محتار، تايه، بيدور على نفسه ومش لاقيها".
وأكدت أن البعض يختار الخطأ ليس لأنه سيئ، بل لأنه موجوع، مضيفة: "فيه ناس بتختار الغلط مش لأنها وحشة بس لأنها موجوعة، محتاجة تتشاف، محتاجة فرصة محتاجة حد يمد إيده بدل ما يرفع صباع الاتهام.. اللي حصل مش صح، بس اللي بيحصل في الناس اللي بتغلط بقى أوحش بكتير.. بقينا مجتمع ما بيرحمش، ما بيسامحش، ما بيديش فرصة تانية.. بقينا نحب الفرجة على السقوط أكثر من تشجيع الوقوف.. ارحموا بعض، افهموا بعض، حاسبوا بس ماتدمرش، علق بسما تقتلش، اللي قدامك ده بني آدم مش تريند".
نسرين إمام: بقينا نستمتع بالوجع وننسى الإنسانية
ودعت نسرين إمام إلى التعاطف بدلًا من التشهير، والمحاسبة الواعية بدلًا من الاستعراض المدمر، قائلة: "ومش بقول اللي حصل صح، بس اللي بيحصل في الناس اللي بتغلط بقى أوحش بكتير. بقينا مجتمعنا ما بيرحمش، ما بيسامحش، ما بيديش فرصة تانية.. بقينا نحب الفرج على السقوط أكثر من تشجيع الوقوف.. في زمن يبقى جلد أسهل من الفهم.. خليك أنت الاستثناء، وخليك إنسان بجد إرحموا من في الأرض يرحمكم اللي فوق ده هوا بيرحم أكثر منا".
وأنهت نسرين رسالتها برسالة مفتوحة للمجتمع كله: "نفسي أفضل أعيد في الجمل اللي كتبتها مليون مرة عشان تفهموا بجد إرحموا كفايه وكفايه من جوه بلدنا نلاقي بتشهر في برامج وما بترحمش تقول كلام بجد مقرف ليه في اي كفااايه من فضلكم".
