أنغام تمدد صلاحية أعمالها الفنية بالاستعانة بهذه التقنية | فيديو
قالت الفنانة أنغام إن تقنية الدولبي أصبحت متواجدة الآن في العالم أجمع، كما أن معظم المغنيين العالميين استعانوا بتلك التقنية في أغانيهم، ونحن لم نكن استخدمناها.
وأضافت: «انا حبيت ليه لأ اغنيتنا المصرية تروح تتعمل بالتقنية دي علشان لو الشباب اللي بيسمعوا وبيحبوا يسمعوا بالتقنيات المختلفة دي يلاقوا اغنية مصرية معمولة كده».
واستكملت: «عاوزة اغنية اللي هي اغنيتي أغنية مصرية عربية تكون موجودة على منصات محترمة جدا بتقنية عالية جدا تعيش، لأن الأغنية كل ما كانت تقنياتها عالية والجودة محترمة تفضل عايشة لأجيال جاية، بتتسمع عمره ما يحس إنها قديمة أو ناقصة ومش قادر اسمعها دلوقتي لأنها مش من نفس الشكل اللي بقينا نسمع بيه، فبحاول يعني أقدمها قدام شوية».
وقالت الفنانة أنغام إنها أثناء تواجدها على المسرح في بعض الأحيان قد تغلبها الموسيقى والمشاعر وتتساقط دموعها، وأن ذلك يحدث مع أي شخص حتى العازفين.
سبب البكاء على المسرح
وأضافت: «انا فاكرة كويس غنيت اغنية عن فرح غايب على المسرح في حفلة بعد وفاة أختي الصغيرة، وكان بعد وفاتها مش بكتير يمكن شهر، وكانت قاسية أوي، وما زلت لما بغنيها بتعب وبتفاداها كتير».
الحبايب اللي كانوا هنا
واستكملت: «الحبايب اللي كانوا هنا دول كتروا شوية، يعني مؤخرا اللي كانوا دول بقوا كتير شوية، بنفتقد ناس كتير عمالة تروح، وخصوصا كمان من وسطنا، فبقت مؤلمة جدا الحكاية بالنسبالي، ومخوفاني شوية، بقيت أفكر طول الوقت في الناس اللي حوليا حبايبي قوي اللي بحبهم اللي ممكن الوقت وزحمت الوقت والحياة والشغل تبعدنا شهور وسنين ما نشوفش بعض، وما نخدش بالنا إننا بقالنا سنة ما شوفناش بعض، فالحكاية دي بقت تخوفني أوي».
وقالت الفنانة أنغام إنه لا يوجد شخص يحصل على كل شيء، كما أن هذا الأمر لم يحدث، موضحة: «الست القوية المستقلة الناجحة المشهورة اللي مش محتاجة حاجه من حد دي امرأة لا تجد رجل أو إن الرجل ما يحتجلهاش ودا كلام واقعي، حتى لو هو قاسي أو مش احلى حاجة، لكن دي الحقيقة».
