أنغام تكشف عن سر بكائها بأغنية «عن فرح غايب».. وسبب خوفها|فيديو
قالت الفنانة أنغام إنها أثناء تواجدها على المسرح في بعض الأحيان قد تغلبها الموسيقى والمشاعر وتتساقط دموعها، وأن ذلك يحدث مع أي شخص حتى العازفين.
سبب البكاء على المسرح
وأضافت: «انا فاكرة كويس غنيت اغنية عن فرح غايب على المسرح في حفلة بعد وفاة أختي الصغيرة، وكان بعد وفاتها مش بكتير يمكن شهر، وكانت قاسية أوي، وما زلت لما بغنيها بتعب وبتفاداها كتير».
الحبايب اللي كانوا هنا
واستكملت: «الحبايب اللي كانوا هنا دول كتروا شوية، يعني مؤخرا اللي كانوا دول بقوا كتير شوية، بنفتقد ناس كتير عمالة تروح، وخصوصا كمان من وسطنا، فبقت مؤلمة جدا الحكاية بالنسبالي، ومخوفاني شوية، بقيت أفكر طول الوقت في الناس اللي حوليا حبايبي قوي اللي بحبهم اللي ممكن الوقت وزحمت الوقت والحياة والشغل تبعدنا شهور وسنين ما نشوفش بعض، وما نخدش بالنا إننا بقالنا سنة ما شوفناش بعض، فالحكاية دي بقت تخوفني أوي».
وقالت الفنانة أنغام إنه لا يوجد شخص يحصل على كل شيء، كما أن هذا الأمر لم يحدث، موضحة: «الست القوية المستقلة الناجحة المشهورة اللي مش محتاجة حاجه من حد دي امرأة لا تجد رجل أو إن الرجل ما يحتجلهاش ودا كلام واقعي، حتى لو هو قاسي أو مش احلى حاجة، لكن دي الحقيقة».
وأضافت الفنانة أنغام: «مافيش أي مشكلة، لأن مافيش حد بياخد كل حاجه أبدا، ما حصلتش وما شوفنهاش دي».
وردّت الفنانة أنغام على سؤال وجهته الإعلامية لميس الحديدي، «حسه إن مافيش حد يستاهلك ولا انتي اللي كنتي بتختاري غلط؟»، لتُجيب أنغام: «فكرة الاختيارات الغلط واردة في كل الناس لأن احنا مش مولودين معانا واصفة، يعني كلنا بنجرب، كل الناس بتجرب، وممكن يبقى أقرب الناس ليكي وأكتر حد بتحبيه وأكتر حد مأمناله يطلع حد تاني خالص انتي ما تعرفهوش خالص».
واستكملت الفنانة أنغام: «انا بعذر الناس كلها في الحاجات دي وبعذر نفسي معاهم، لأن احنا في الآخر إنسان، إحنا إنسان بيجرب في الحياة».
استضافة لميس الحديدي الفنانة أنغام
وحلّت الفنانة أنغام ضيفة بحلقة برنامج «كلمة أخيرة» والمذاع عبر قناة «On»، تقديم الإعلامية لميس الحديدي، وتحدثت «أنغام» عن قصة حبها؛ قائلة: «عمري ما قفلت قلبي لكن عندي أولويات، أو بقت عندي متعة في الحياة قادرة افهم قيمتها اكتر بكتير من أي حاجة تانية أو أي حد».
