الفنانة أنغام: «بحتاج لناس تكون جنبي.. أنا مش هيرو للدرجة دي»
ردت الفنانة أنغام، على سؤال الإعلامية لميس الحديدي عن حاجتها لوجود شخص بجوارها، قائلة: «بحتاج، أكيد أنا مش هيرو للدرجة دي يعني، أكيد بحتاج، أنا هيرو في شغلي، إنما فيه ناس طبعا في الحياة بكلمهم، وفيه أصدقاء بتعكز عليهم طبعا طبعا، موجودين ونعمة من ربنا الحمد لله».
الست القوية المستقلة الناجحة
وقالت الفنانة أنغام، لا يوجد شخص يحصل على كل شيء، مشيرة إلى أن : «الست القوية المستقلة الناجحة المشهورة اللي مش محتاجة حاجة من حد دي إمرأة لا تجد رجل أو أن الرجل ما يحتجلهاش ودا كلام واقعي، حتى لو هو قاسي أو مش أحلى حاجة، لكن دي الحقيقة».
فكرة الاختيارات الغلط
وردّت الفنانة أنغام على سؤال وجهته الإعلامية لميس الحديدي، «حاسه إن مافيش حد يستاهلك ولا انتي اللي كنتي بتختاري غلط؟»، لتُجيب أنغام: «فكرة الاختيارات الغلط واردة في كل الناس لأن احنا مش مولودين معانا واصفة، يعني كلنا بنجرب، كل الناس بتجرب، وممكن يبقى أقرب الناس ليكي وأكتر حد بتحبيه وأكتر حد مأمناله يطلع حد تاني خالص انتي ما تعرفهوش خالص».
إنسان بيجرب في الحياة
واستكملت الفنانة أنغام: «انا بعذر الناس كلها في الحاجات دي وبعذر نفسي معاهم، لأن احنا في الآخر إنسان، إحنا إنسان بيجرب في الحياة».
استضافة لميس الحديدي الفنانة أنغام
وحلّت الفنانة أنغام ضيفة بحلقة برنامج «كلمة أخيرة» والمذاع عبر قناة «On»، تقديم الإعلامية لميس الحديدي، وتحدثت «أنغام» عن قصة حبها؛ قائلة: «عمري ما قفلت قلبي لكن عندي أولويات، أو بقت عندي متعة في الحياة قادرة افهم قيمتها اكتر بكتير من أي حاجة تانية أو أي حد».
قيمة أبناء أنغام
وأضافت الفنانة أنغام: «مش هحط ولادي في مرتبة تانية مالهاش مقارنة مع أي حد، أو أي حاجة في حياتي، يعني مش هحطهم وأقارنهم أو أعدهم في أي حاجة في حياتي، هما دول ملوك حياتي».
