أول تعليق من يسرا اللوزي بعد أزمة تصريحاتها الأخيرة : ماجبتش سيرة الكشري
أوضحت الفنانة يسرا اللوزي المقصود من تصريحاتها الأخيرة حول الفارق بين الأكل المصري والسوري، والتي تعرضت على إثرها لموجة من الانتقادات عبر السوشيال ميديا، خلال الأيام القليلة الماضية.
وكتبت يسرا اللوزي في تعليق عبر فيسبوك : "أنا ما جبتش سيرة الكشري خالص أنا كنت هقول كيس شيبسي اللي أحياناً كتير إحنا كمصريين بنسکت بيه جوعنا، وأنا شخصيًا بعمل كده ساعات عادي، وبعدين قررت ما أقولش اسم براند بعينه فما حددتش كيس إيه".
وتابعت : "الاجتهادات الذاتية دى غير مرحب بيها، ثم إنني لم أقارن بين المطبخ المصري والمطبخ السوري أصلًا، أنا اتكلمت عن سمة أو صفة موجودة في شخصيتى في الفيلم اللي بتشتغل food blogger، و وصفت الشخصية على إنها نمكية في الأكل وإني أنا كمان الأسف صعبة شوية في النقطة دي زي الشخصية، حيث إن السادة الصحفيين كانوا بيسألوا عن أوجه التشابه بيني و بين شخصية مها اللي بلعبها في فيلم برلين".
وأكملت يسرا اللوزي : "ولكن هل أنا اتكلمت عن الفرق بين المطبخين؟، لا لأني في الواقع بحب الإتنين زي بعض بالظبط، اللي حابب يعمل بحث ويدور على لقاءات سابقة على مر السنين هيلاقي دايمًا إن كل ما يسألوني عن أكلاتي المفضلة، الإجابة بتكون كشري أو ملوخية أو محشي كرنب، فكون إن حد يقرر يفسر الكلام من غير ما يعرف السياق اللى اتسأل فيه السؤال، ومش عارف السؤال أصلاً وياخد الإجابة لوحدها، ويضيف عليها تفسيره الغير صحيح دى حاجة غير مقبولة الحقيقة".

