بعد حملات الهجوم.. عبلة سلامة: "قررت أقفل التعليقات والماسنجر"
قررت الإعلامية عبلة سلامة أن تُغلق التعليقات على صفحاتها الشخصية والماسنجر الخاص بها، وذلك بسبب كثرة حملات الهجوم عليها، وذلك من خلال منشور عبر حسابها الرسمي على موقع التواصل الإجتماعي فيسبوك.
عبلة سلامة تغلق التعليقات والماسنجر
وعلقت عبلة سلامة قائلة: "قررت من النهارده أقفل التعليقات على أي بوست جديد أنشره، وكمان أقفل الماسنجر، لحين إشعار آخر، وباعتذر لكل الناس الجميلة والمحترمة اللي موجودة على صفحتي، وهم الأغلبية، واللي نشأت بيني وبينهم علاقة حلوة حتى من غير ما نتقابل. ناس بقيت عارفاهم بالاسم، ستات ورجالة محترمين بجد، واعتز بوجودهم جدًا، لكن كمية البذاءة والقذارة والانحطاط اللي بشوفها بقت فوق الاحتمال. ولما بقفل التعليقات على بوست معين، فيه ناس بتدخل مخصوص تشتم على بوست تاني، وأنا في غنى تام عن القذارة دي، وعن أي شيء يستنزف أعصابي ويؤثر على نفسيتي، أنا ست عارفة ديني كويس، وبحب بلدي جدًا، وبراعي ربنا في كلامي وتصرفاتي على قد ما أقدر. ومش موجودة في الدنيا علشان أرضيك ولا أرضيكي، ولا علشان أعيش بالطريقة اللي تعجبكم. أنا مش مخلوقة علشانكم أصلًا!، ولا حد فيكم له الحق يحاسبني أو يحاسب أي إنسان. الحساب عند ربنا وحده، والدين اللي بتتكلموا باسمه مش شتيمة ولا تجريح ولا خوض في أعراض الناس. الدين رحمة وأخلاق وعفة لسان. الدين إنك تتحكم في لسانك وتصرفاتك قبل ما تنصب نفسك قاضي على البشر، إنت مين أصلًا علشان تحكم عليّا أو على أي حد؟
أنا عمري ما شفت المستوى ده من الكراهية والبذاءة، لا في أحداث 2011، ولا حتى في أيام حكم الإخوان، واللي محزنني وغاضبني أكتر إن الدولة بكل مؤسساتها بتتفرج على اللي بيحصل، وسايبة الناس تواجه كل القذارة دي من غير رادع حقيقي، ولا محاسبة، ولا تطبيق للقانون يوقف الانفلات ده، وهفضل أكتب وأقول رأيي زي ما أنا، لكن مش هسمح لحد يستنزف أعصابي أو يؤثر على راحتي النفسية."
