عبلة سلامة: "عمري ما خوفت أقول رأيي لكن المواقع بتجتزأ كلامي وتعمل تريند"
خرجت الإعلامية عبلة سلامة عن صمتها لتكشف عن رفضها تلقيبها بلقب الإعلامية، وتفضل لقب محاورة، وتكشف عن استيائها من اجتزاء تصريحاتها وتحويلها إلي تريند، وذلك من خلال منشور عبر حسابها الرسمي على موقع التواصل الإجتماعي فيسبوك.
عبلة سلامة: "أنا ست حققت حلمي"
حيث قالت عبلة سلامة: "أنا عارفة إن كلمة «إعلامية» ممكن تنطبق عليّا بحكم دراستي وشغلي، لكن الحقيقة إني مش بحب اللقب ده، ولا بحس إنه بيعبر عني، أنا بحب أشوف نفسي محاورة، ست بتحب تسمع الناس اللي بتعرفوهم من بعيد وتسمع حكاياتهم. وتظهر الجانب الإنساني منهم والأهم من أي لقب، إني ست حققت حلمها في مرحلة من عمرها ما كانتش متخيلة إنها هتحققه فيها. عملت برنامج واحد «عندك وقت مع عبلة»، ودلوقتي بصوّر موسمه التاني، لكن بعيدًا عن الألقاب، أنا ست من 2011، وسط كل اللي مرت بيه بلدي، عمري ما خوفت أقول رأيي. وحتى في فترة الإخوان، قلت رأيي بمنتهى الصراحة رغم إن ده كان ممكن يعرضني للخطر. وعمري ما حسبتها كده".
اجتزاء تصريحات عبلة سلامة وتحويلها إلي تريند
واستكملت عبلة سلامة حديثها قائلة: "ولحد النهارده بقول رأيي بمنتهى الأدب والاحترام، لكن ألاقي مواقع بتاخد جزء من كلامي وتعمل منه ترند، وأفاجأ بسيل من الإهانات الشخصية من ناس لا تعرفني ولا سمعت كلامي كامل، والحقيقة إن أغلب التعليقات مش اختلاف في الرأي أصلًا، دي هجمة عليّا أنا شخصيًا، لأنك لو مختلف معايا، من حقك ترد على رأيي برأيك. لكن إيه اللي يخليك تشتمني؟ يمكن الغضب اللي جواك مالوش علاقة بيا، لكنك لقيت في شخص ما تعرفوش فرصة تطلّع عليه غضبك ومشاكلك .. وتحس للحظة إنك اقوي من ورا شاشة، وأنا متأكدة إن كتير من اللي بيكتبوا الكلام ده، لو قابلوني وش لوش، مش هيقدروا يقولوه. ارائي وكتباتي تدل علي اخلاقي وتعليقاتك تدل علي أخلاقك !، أنا مش بطلب من حد يتفق معايا، لكن فيه فرق كبير بين الاختلاف والإهانة. واللي بيختار يشتمني بدل ما يناقشني، بيقول عن نفسه أكتر بكتير ما بيقول عني."
واختتمت عبلة سلامة حديثها قائلة: "وفي النهاية، أنا ست حققت حلمها بعد الستين .. ايوه بعد الستين اللي كان جزء من الاهانات برضه! ، ولسه عندها رأي ولسه عندها أحلام. لا السن هيخليني أسكت، ولا الإهانة هتخليني أخاف أقول رأيي. والحل بسيط علي فكرة. بلاش تتابعيني!"
