نوال الدجوي: "بابا كان بيحب عائلته بصدق ودي كانت أكبر غلطة"
أعربت نوال الدجوي، ابنة الراحل الدكتور أحمد الدجوي،عن خيبة أملها في بعض أفراد العائلة الذين خذلوا والدها في أصعب الأوقات، رغم محبته الشديدة لهم وثقته العمياء فيهم.
ونشرت نوال بعض الصور التي تجمعها بعائلتها عبر صفحتها الشخصية على "فيس بوك"، أرفقته بتعليق جاء فيه: “حب العائلة غير مشروط، ومهما قلت أو فعلت، مش هيغير ده أبدًا… أو على الأقل ده اللي كان بابايا مؤمن بيه وعاش بيه. كان دايمًا يقول إن الدم بيربطنا، وإننا لازم نفضل جنب بعض في الشدة قبل الرخاء. لكن اللي بابايا مكانش يعرفه إن بعض الناس اللي حبهم ووثق فيهم واهتم بيهم من العيلة، هما نفسهم اللي كانوا السبب في نهايته”.
وأضافت: “من أكبر عيوب بابا إنه لما كان يثق في حد، كان بيديله قلبه وحياته، وكان مؤمن إن مهما عملوا من حاجات غلط، عمرهم ما هيئذوه الأذى ده… يا ريت كان عارف قد إيه هو كان غلطان”.
وتابعت نوال الدجوي: “العيلة كانت حاجة مهمة جدًا بالنسبة لأحمد الدجوي، كان بيحب عيلته، بيحب استقرار العيلة، وكان بيحب الإحساس بالقوة والوحدة لما يبقى أهله حواليه. علشان كده بابايا عمره ما كان ضعيف، حتى في أصعب الأوقات، لأنه كان حاسس بإخواته جنبه. مش علشان محتاجهم في شغل أو مصلحة، لا، هو بس كان محتاجهم يبقوا جنبه، واثق إنه لو حصل له حاجة، هيبقوا أول ناس موجودين”.
نوال الدجوي: “بابا كان مؤمن إن حب العيلة غير مشروط لكن خاب ظنه”
وأكملت ابنة أحمد الدجوي: “وكان عنده صحاب بيعتبرهم زي أهله، وكان واثق إنهم هيبقوا موجودين أول ما يحتاجهم. وكان عارف إن مراته، لو حصل له أي حاجة، هتكون جنبه تواسيه. وكان عارف إن ولاده هيضحكوه حتى في أصعب الظروف”.
واختتمت نوال الدجوي منشورها قائلة: “بابا كان عنده حق، حب العيلة فعلاً غير مشروط، لكن الحقيقة إن مش كل اللي فيهم نفس الدم نقدر نسميهم عيلة. العيلة الحقيقية هي اللي بتحبك وتحميك في كل الظروف، مش اللي بيتغيروا بسبب الطمع والفلوس”.
