لحياة زوجية سعيدة.. استشارية أسرية تقدم 10 نصائح لاستمرار العلاقة
في حلقة خاصة من برنامج "الرحلة" المذاع على قناة الناس، وجهت الدكتورة سماح عبد الفتاح، الاستشارية في العلاقات الأسرية، رسالة إنسانية مفعمة بالدعم والوعي لكل عروس تخطو أولى خطواتها في الحياة الزوجية، مؤكدة أن الليلة الأولى لا ينبغي أن تكون مصدرًا للخوف أو التوتر، بل لحظة تأسيس لعلاقة قائمة على الأمان والاحتواء.
وقالت عبد الفتاح:"رسالتي النهارده لكل عروسة جميلة... في أول يوم، في أول أسبوع، في أول لحظة من حياتها الزوجية، عايزة أقولك بكل حب: اطمني، والرسالة مش ليكي لوحدك، دي ليكي ولشريكك، لأن هو خلاص بقى الأمان بتاعك، بقى الراجل اللي ربنا جعله حلالك وحاميك من الليلة دي وطول العمر".
مزيج من حب وثقة وأمان
وأوضحت: "واحدة من أجمل العبارات اللي قريتها عن الليلة دي: ما لا يُؤخذ بالذوق لا يعظم له الشوق، يعني ببساطة، الهدوء واللين هم اللي بيبنوا العلاقة دي صح، والبداية دي مش زي أي بداية، دي لحظة فارقة، واللي فيها مشاعر كتير، مزيج من حب وثقة وأمان، بس في المقابل كمان فيه رهبة وقلق، وده طبيعي".
الحفاظ والخصوصية
واستكملت: "كل أب وأم ربوا بناتهم على الحفاظ والخصوصية، وفجأة المجتمع بيطلب من البنت دي إنها تنقلب في لحظة وتكون جاهزة لحياة تانية، من غير تمهيد حقيقي، ومن غير فهم كافي، وهنا ييجي دور العريس... هو اللي معاه البوصلة، واللي لازم يوجه الليلة دي للسلام، مش للعنف، للود، مش للضغط".
وواصلت: "أنا بطلب من كل شاب، خليك رحيم، خليك حنون، خليك فاهم إنك بتتعامل مع بنت داخلة على حياة جديدة بكل تفاصيلها، مش بس علاقة جسدية، لأ، دي شراكة روحية وإنسانية كاملة. ولو تعبتوا يومها أو حسيتوا إنكم مش قادرين، عادي، ارتاحوا، مفيش مشكلة. المهم إن البداية تكون صح، فيها طمأنينة وحب وستر".
وأضافت: أوصي كل عريس وعروسة بركعتين قبل أي شيء، نبدأ بالبركة، نبدأ بالدعاء، نبدأ بسؤال ربنا إنه يبارك في البيت ده ويحفظكم من كل شر، افتكروا دعاء النبي صلى الله عليه وسلم: بسم الله، اللهم جنبنا الشيطان وجنب الشيطان ما رزقتنا، ده دعاء بسيط لكن أثره كبير في حياتكم".
