من العرق إلى فقدان الوعي.. أستاذ باطنة يكشف خطورة ضربة الشمس

تحدث الدكتور أشرف عقبة أستاذ الباطنة والمناعة، عن الفرق بين ضربة الشمس والإجهاد، قائلا إنه عند التعرض لدرجات حرارة مرتفعة وخاصة في فصل الصيف، قد يحدث جفاف في البداية، ومن ثم إجهاد حراري، ومن هنا تأتي ضربة شمس، بمعنى أنه موضوع متدرج من مشكلة واحدة.

خطورة الإجهاد الحراري

وأضاف، خلال لقاءه عبر القناة الأولى المصرية، أن أي شخص يتعرض لدرجات حرارة عالية وخاصة في وقت الظهيرة من الساعة 11 وحتى الساعة 4 عصرا، يجب أن يكون هناك تغطية أو مكان مظلل، مع تناول السوائل بشكل مناسب حتى في حالة عدم الإحساس بالعطش، معلقا: «ده علشان يمنع إنه يدخل في الجفاف أو الإجهاد الحراري أو ضربة الشمس اللي هي حالة طارئة تحتاج إلى دخول المستشفى».

إجراءات لازمة في الحرارة المرتفعة

وتابع: «المفروض إن أي حد بيتعرض للشمس بشكل مباشر بيشتغل مثلا في أماكن مفتوحة أو مفيهاش فرص إنه يكون في ظل بشكل كويس، يلبس القبعات أو الطواقي اللازمة للكلام ده، ولازم يشرب سوائل كتير حتى لو ما عندوش إحساس بالعطش، كمان زملاؤه لازم يكونوا واخدين بالهم من بعض، المجموعة دي لازم يحافظوا على بعض».

وواصل: «لو بدأ يشعر بإحساس بالدوخة أو ضربات قلب سريعة أو تشنجات في العضلات أو ألم في الجسم أو عرق شديد إحنا هنا دخلنا في الإجهاد الحراري، في الحالة دي لازم ياخدوه ويقعد في أماكن مظللة ويشرب سوائل كتير ويخففوا الملابس اللي عليه ولازم يلبس ملابس خفيفة، وممكن يبردوا جسمه بالمياه، علشان ده يساعد على إنه ما ينتقلش للمرحلة الأكبر اللي هي مرحلة ضربة الشمس».

الفرق بين الإجهاد الحراري وضربة الشمس

وأكد أن الفرق بين الإجهاد الحراري وضربة الشمس إنه في الإجهاد الحراري يكون هناك عرق شديد قوي، لكن في ضربة الشمس هنا ما بعرقش، هيبقى الجلد جاف، لأن المخ المفروض إنه بيتحسس درجات الحرارة الشديدة وبيحاول يتخلص منها أو يساعد على إنه ميحصلش ارتفاع في حرارة الجسم عن طريق العرق.

تشنجات شديدة وحالة طارئة

وأكمل: «لو المخ بدأ يفقد الحساسية دي هنلاقي الشخص معندوش عرق، وبالتالي جسمه بيرتفع درجة حرارته بسرعة، فنلاقي الإجهاد الحراري درجات حرارة الجسم فيه بتكون حوالي 38 أو 39 وأقل من 40، لكن في ضربة الشمس درجة الحرارة بتكون أعلى من 40».

واختتم: «لو حصلت ضربة شمس في الحالة دي ممكن يفقد الوعي وممكن يحصل له تشنجات شديدة ودي حالة طارئة لازم يطلب الإسعاف فورا ويتوجه إلى الأماكن اللي تقدر تقدم له الخدمات الطبية».