الرئيس السيسي لـ الأئمة: «خليكو حماة الحرية.. ومصر ستظل منارةً للإسلام الوسطي»
وجه الرئيس عبد الفتاح السيسي خلال احتفالية تخريج الدورة الثانية لتأهيل أئمة وزارة الأوقاف من الأكاديمية العسكرية المصري: «خليكو حماة الحرية، وخلي كل واحد هو حر، أنت اديله حقه، يفوتك الكتير أوي لو فاتك، يفوتك الكتير أوي لو ما رضيش عنك، يفوتك الكتير أوي لو ما اتشرفتش بالإيمان بيه، وبذكره، ربنا يوفقكم واحنا حاولنا أننا نعمل حاجه وقمنا بالدور دا ولسه الدور بيستكمل بيكم انتم، بتمنلكم كل التوفيق».
التوحد على قلب رجل واحد
وأضاف الرئيس عبد الفتاح السيسي: «بتمنى لكل الناس في مصر إن هما نبقى على قلب رجل واحد في بناء الإنسان، كل الإنسان، مش بس على المستوى الديني، لا كل الإنسان».
المساجد والتعليم
واستكمل الرئيس السيسي: «احنا عندنا مساجد كتيرة جدا، وعندنا في نفس الوقت حجم قليل من المدارس، وكان أيام النبي صلى الله عليه وسلم بتستخدم المساجد دي لكل شؤون الدنيا، طب ليه النهاردة إحنا مش بنستفاد من المساجد دي اللي موجودة، بتشتغل بالكتير في كل صلاة 10 دقائق ربع ساعة علشان ممكن نخلي فيها بشكل أو بآخر لبعضها اللي يصلح لكده إن إحنا نعلم فيها ناس، لولادنا كل ولادنا، طب يقولك نعمل المدرسة ولا نعمل الجامع، طب ما ممكن اعمل الجامع ويبقى جواه مدرسة برده».
إعداد إنسان متوازن ومسؤول حسب المهمة
وأكد الرئيس عبد الفتاح السيسي: «احنا حاولنا وبنحاول دايما كدولة أن نبذل كل جهد في إعداد إنسان متوازن ومسؤول حسب المهمة أو العمل اللي هيكلف بيه، حاولنا نعمل كده، إن وفقنا دا فضل من ربنا وإن كنا لم نوفق فمحتاجين نبذل جهد أكبر ونراجع نفسنا اكتر مرة تانية».
تجديد الخطاب الديني
وأكد الرئيس عبد الفتاح السيسي: “أدركنا منذ اللحظة الأولى أن تجديد الخطاب الديني لا يكون إلا على أيدي دعاة مستنيرين أغنياء بالعلم واسعي الأفق”.
منارةً للإسلام الوسطي المستنير
وقال الرئيس السيسي: “إن مصر، بتاريخها العريق وعلمائها الأجلاء ومؤسساتها الراسخة، كانت وستظل منارةً للإسلام الوسطي المستنير، الذي يُعلي قيمة الإنسان، ويُكرّم العقل، ويحترم التنوع، ويرسي معاني العدل والرحمة”.
