الناس اللي بتصور الكفن ماتربتش .. زوج آية سماحة يعلق على أزمته مع الصحفيين
خرج المخرج محمد السباعي، زوج الفنانة آية سماحة، للرد على الجدل المُثار بسبب منشوره خلال الساعات الماضية، الذي هاجم خلاله مصوري الجنازات بـ لفظ خارج، وعلقت زوجته على منشوره بالهجوم كذلك عليهم.
زوج آية سماحة يتحدث عن هجومه على الصحفيين
وقال السباعي خلال فيديو عبر حسابه على فيسبوك : “أنا بعمل الفيديو ده علشان الموضوع بيمسني بشكل شخصي واتأذيت منه في حياتي، وكان عندي ناس كتير في العيلة معروفة بشغلها، وكنت دائمًا بشوف في أي عزاء عندنا في العيلة ناس غريبة بتصور وبتسألنا أسئلة غريبة مهما حاولنا نمنعهم”.
وعن هجومه على الصحفيين، علق : “أنا مابغلطش في الصحفيين وفي ناس كتير من صحابي صحفيين وفي ناس متربي معاهم صحفيين وفي ناس من أهلي شغالين صحفيين، الموضوع مالوش علاقة بالشغلانة، لأن الفعل اللي أنا بتكلم عليه ده المفروض نقابة الصحفيين شخصيا يبقى عندها مشكلة معاه أو على الأقل تعرف تعاقب الناس دي إزاي”.
سبب هجوم محمد السباعي على مصوري الجنازات
وأوضح محمد السباعي سبب هجومه على مصوري الجنازات، قائلًا : “أنا بتكلم على المنظر وعلى الناس اللي كانت بتصور سليمان عيد في الجنازة وهوا جوا الكفن، وأنا مش بعتذر للناس دي خالص، وشايف الناس دي غلط وماتربتش ولازم يتعاقبوا بأي شكل من الأشكال، ولو هم تبع النقابة يبقى النقابة تتصرف، وشايف أن مشكلتي دي عند ناس كتير جدًا وبيتأذوا منها، وشايف إن لو في أي حد مسك موبايل وفكر إنه يخش في عزاء مهندس أو دكتور الناس مش هتتعامل معاه بشكل لطيف خالص”
واختتم السباعي موجهًا حديثه إلى أحد الصحفيين : “وبمناسبة الصحفي اللطيف اللي عامل بوست بيشتم فيا وفي أهلي وبيحرض الناس تعمل فيا محاضر .. وأنا مش هعتذر خالص والناس اللي بتعمل كده قليلة الذوق وماتربتش وتعبانين في دماغهم، لأنهم بيعملوا حاجة زي دي وياريت نقابة الصحفيين تتصرف لو الناس دي تابعة للنقابة ”.
آخر أعمال آية سماحة
يُذكر أن آخر أعمال الفنانة آية سماحة، كان مسلسل الكابتن، والذي جمعها بـ الفنان أكرم حسني، وعُرض في موسم دراما رمضان الأخير، وشارك في العمل كل من، سوسن بدر، أحمد عبدالوهاب، رحمة أحمد، أحمد الرافعي، محمد رضوان، سامي مغاوري، عمر شرقي، مؤمن نور، ميمي جمال، ووئام مجدي، والمسلسل من قصة أيمن الشايب، تأليف عمرو الدالي، وإخراج معتز التوني.
