صاحب البوست نصاب.. حسين أبو حجاج ينفي شائعة إصابته بالسرطان
رد الفنان حسين أبو حجاج، على شائعة إصابته بمرض السرطان، والتي تم تداولها في الساعات الماضية، عبر منصات "السوشيال ميديا"، مما أقلق متابعيه وجمهوره عليه.
تهنئة بالعيد
وقال أبو حجاج في فيديو عبر صفحته الرسمية علي فيسبوك، هنأ جمهوره من خلاله بعيد الفطر : "كل عيد وأنتم بخير، وربنا يبلغنا ويبلغكم رمضان والعيد وأنتم بأحسن صحة وأحسن حال، وكل عام ومحبيني وشعب مصر الجميل بخير".
نفي الشائعة
وتابع "أبو الحجاج " : "أنا دلوقتي عامل الفيديو ده، علشان أقول إن في حد ابن حرام مطلع بوست وقايل فيه إني مريض جدًا وعندي سرطان ".
وأكمل مستنكرًا الترويج لشائعة مرضه : "أنا مش عارف الناس دي بتجيب الكلام ده منين ؟ وإيه المقصود في إنه يقول الكلام ده على واحد مايعرفهوش ؟".
وأضاف حسين أبو حجاج في الفيديو : "الراجل ده كاتب إن حالتي حرجة و يدعو الناس يمدوا لي إيد المساعدة، وطبعًا الكلام ده محصلش. وأنا اتمتع بصحة جيدة، وكنت صايم رمضان وعيدت في وسط ولادي الحمد لله والدنيا زي الفل، وأنا ماشي بفضل ربنا سبحانه وتعالى ودعاء والدي فأنا مش عارف الناس بتجيب الكلام ده منين !".
وواصل أبو حجاج متحدثًا عن شائعة مرضه : “المهم كمان إنه هو حاطط رقم تليفون ورقم حساب للي عايز يتبرع ليا، والكلام ده نصب وده راجل نصاب وأنا "رنيت" على الرقم اللي حاطه في البوست علشان أشوف بيقول كده ليه، وماردش. و"التروكولر" كاتب عليه نصاب ومحتال".
رسالة حسين أبو حجاج لمتابعيه
واختتم الفنان موجهًا رسالة إلى متابعيه: "عارف إنكم دايمًا بتدافعوا عني. ولما حد بيقول لفظ بذئ عليا، بلاقي الناس كلها محبيني بيشتموه ويهزؤه، وتعليقاتكم الجميلة عندي مخلياني رقبتي طويلة أوي".
يُذكر أن حسين أبو حجاج سبق وكشف قبل انطلاق شهر رمضان، عن استعداده لمتابعة مسلسل الغاوي من بطولة أحمد مكي، نظرًا للعلاقة القوية بين حسين ومكي، وشارك وقتها أبو حجاج عبر فيسبوك، البوستر الدعائي لـ أحمد مكي من مسلسل الغاوي.
وكتب حسين في منشوره: "أحمد مكي يجسد شخصية شمس الغاوي، شاب من منطقة شعبية في مصر القديمة يعمل بلطجي، لكنه يقرر التوبة مع تطور الأحداث، ويبدأ رحلة صعبة للبحث عن عمل شريف، رغم التحديات الكبيرة التي يواجهها في مساره نحو التغيير".
وأكد حسين أبو حجاج متابعته للمسلسل، حيث أضاف في نفس المنشور : "إذا عشنا وربنا بلغني رمضان، لن أتابع سوى مسلسل الغاوي بإذن الله تعالى".
