ما قدرتش تنام؟ 13 حيلة بسيطة تساعدك عل النوم ..وما تعدش خرفان!

صعوبة النوم في نص الليل موقف ناس كتير بتواجهه، وغالبًا بيبدأ العقل في التفكير اللامتناهي: الشغل، المشاكل، مواقف قديمة.. بس الخبر الحلو إن في حيل بسيطة وفعّالة ممكن تساعدك ترجع تنام من غير ما تلف وتتقلب بالساعات.

ما تعدش خرفان! جرب حاجة تشغّل مخك

الدكتور عيدن محمودزاده، استشاري النوم البريطاني، يقول حسب تقرير صحيفة الجارديان ، إن عد الخرفان مش مفيد زي ما الناس فاكرة، الأفضل إنك تشغل مخك بحاجة بسيطة، زي العد العكسي من 100 أو لعبة الحروف: اختار كلمة، زي "كورة"، وابدأ تقول كلمات بحرف الكاف، وبعدها الواو.. وهكذا. الهدف إنك تشغل دماغك عن التفكير المقلق.

اسمع حاجة تاخدك لعالم تاني

بدل ما تمسك الموبايل وتدخل دوامة السوشيال ميديا، شغّل بودكاست هادي أو رواية صوتية قديمة بتحبها، زي ما بتعمل "جولي" من لندن، اللي بتسمع Pride and Prejudice كل ليلة علشان تهرب من أفكار اليوم.

البعض بيفضل صوت الراديو، أو حتى الضوضاء البيضاء بتردد منخفض، أو صوت المروحة، المهم يكون في صوت بيغطي التفكير ويهدي الدماغ.

ابعد عن الساعة ومتتفرجش عليها

بلاش تبص في الساعة لما تصحى، ده بيخلي دماغك تحسب الوقت اللي ضاع وده بيزود التوتر، الأفضل إنك تبعد الساعات من أوضتك ومتقربش من الموبايل إلا لو بتشغّل حاجة تساعدك تنام.

درجة الحرارة بتفرق

درجة حرارة أوضتك لازم تكون حوالي 18 درجة، لو سخنت جامد، جسمك هيفضل صاحي، ولو عندك هبات حرارية بسبب تغيرات هرمونية، استخدم مروحة أو بلل رجلك بمية باردة، "كايتلين" من ليفربول بتقول: "بشيل الغطا شوية ولما أبرد، أرجع أغطي نفسي.. وسرعان ما بنام".

ركز في النفس.. وماتقلقش إنك صاحي

تمارين التنفس زي "4-7-8" أو تخيل إن جسمك بيتحول لمعدن ثقيل من الراس للقدمين بتساعد تهدي الجسم والعقل. والأهم من كده: ماتقلقش إنك صاحي! الدكتور "جاي ميدوز" بيقول: "اسمح لنفسك إنك تفضل صاحي، ده أفضل من مقاومة السهر، والنتيجة؟ هتنام بسرعة من غير ما تحس".

غير مكانك أو وضع نومك

لو مر وقت طويل ومش ناوي تنام، انزل من السرير واعمل حاجة بسيطة: اقرا كتاب، رتب رف، أو حتى اغسل طبق. ولما تحس إنك فعلاً بدأت تنعس، ارجع للسرير. أوقات تغيير المشهد هو السر في رجوع النوم.

خفف الأكل والسوايل قبل النوم

الأكل في نص الليل مش فكرة كويسة، لأنه بيخلي الجسم يصحى للهضم بدل ما ينام. لو جعان، خليك على وجبة خفيفة قبل النوم زي زبادي، شوفان، أو ساندويتش صغير بالبروتين.

مش لازم تنام جنب شريكك دايمًا

لو شريك حياتك يصدر أصوات أثناء النوم أو بياخد نص السرير، النوم في غرفة تانية مش نهاية العلاقة! بل ممكن تكون بداية جديدة فيها طاقة أحسن ونوم أهدى.

نومك بالليل يبدأ من نهارك

خف كافيين، اتعرض للشمس الصبح، خليك نشيط خلال اليوم، ومارس رياضة خفيفة، وابعد عن القيلولة الطويلة. كل ده بيساعد جسمك يكون جاهز ينام لما ييجي الليل.