ميدو: من حلمي زامورا للتالتة يمين.. شيكابالا حكاية عشق لا تنتهي
وجه أحمد حسام "ميدو" نجم الزمالك السابق، التحية إلى محمود عبدالرازق "شيكابالا"، مشددًا على أنه لم يكن مجرد لاعب عادي، بل حالة إنسانية وفنية فريدة لن تتكرر في الملاعب المصرية.
وقال ميدو، في تغريدة له عبر حسابه الرسمي بمنصة إكس: "شيكابالا مش زي أي لاعب عادي، لأنه ببساطة كان إنسان قبل ما يكون لاعب كرة، ربنا أنعم عليه بالموهبة الفطرية، ومعاها قلب طيب زي معظم أهلنا في أسوان".
وأضاف: "محمود عبد الرازق أعرفه كويس جدا، صاحب جدع وراجل من صغره، ولما اتزاملت معاه في الملعب كان قيمة فنية نادر أنك تقابلها في الملاعب المصرية، ولما دربته سواء في الزمالك أو الإسماعيلي، كان لاعب فذ يقدر يقلب أي ماتش.. شيكابالا أتولد في مدرجات حلمي زامورا، وأتولد وعاش جوة نادي الزمالك واختار أنه يكون أسطورة، على مدار ٣٠ سنة لعب كورة في قطاع الناشئين والفريق الأول، وكما طريقه لحد ما أصبح كابتن تاريخي لنادي الزمالك".
وتابع ميدو قائلا: "موهبة شيكابالا كانت تؤهله يلعب في أكبر أندية العالم، لكن حتى لما في بعض الأوقات الحظ مكنش بيقف معاه والظروف تعانده، كان بيرجع لبيته الزمالك عشان يكمل معاه رحلته، ويفضل هو روح الزمالك.. في أوقات كتير كان الفريق مش في أحسن حالاته بس شيكابالا شايل الزمالك على كتفه، وحتى لما جة لاعيبة كويسة في وقت تاني، كان شيكابالا موجود كابتن بروح ميت عقبة بيدلهم على طريق البطولات ومنصات التتويج.. ودلوقتي بعد ما قرر يعلق حذاءه، ويحرمنا من متعة الفرجة على سحره في الملعب، مكانه الطبيعي الرجوع لمدرج التالتة يمين، ويتكتب اسمه بحروف من نور وسط أساطير الزمالك الكبار".
واختتم ميدو تغريدته قائلًا: "رحلتك دلوقتي كادر مميز للزمالك والبداية بردوا من المدرج زي ما بدأت من 30 سنة يا ساحر".
اعتزال شيكابالا
وكان النجم شيكابالا، أعلن تعليق حذائه بعد رحلة استمرت أكثر من 20 عاماً داخل المستحيل الأخضر، وقال شيكابالا عبر قناة "إم بي سي مصر 2”: انتهت رحلتي مع كرة القدم، أنا حاسس إني قدمت كل حاجة مع الزمالك وكرة القدم وكان لازم اخد القرار ده، وقدمت كل حاجة وجمهور الزمالك هيفضل في قلبي".
وأكمل : "أنا شايف حب الناس ليا وجمهور الزمالك هيفضل يحب شيكابالا بعد الاعتزال، كان في ناس كتير طلبت مني أكمل سنة كمان، لكن أنا شوفت إن ده المناسب".
