ياسمين عز: قومي انزلي في عز الحر وهاتي لجوزك كيلو تين شوكي يأكله لوحده | فيديو

وجهت الإعلامية ياسمين عز، نصيحة بمناسبة شعور السيدات بالحر قائلة: «قومي البسي واحنا في إجازة كده وانزلي في عز نار الحر وامشي تحت الشمس الحارقة، استمدي فيتامين د من مصدره، وروحي هاتي لجوزك كيلو تين شوكي، يأكله لوحده من فلوسك، هاتيله 30 تينة في 10 ب 300 جنيها عادي ادفعي، انتي بتجيبي منظفات للمطبخ بأكثر من 300 جنيه».

ياسمين عز: هاتي لجوزك تين شوكي لوحده

وأضافت الإعلامية ياسمين عز، خلال برنامجها «كلام الناس»، المذاع عبر قناة «إم بي سي مصر»: «حطيله التين الشوكي بقشره وشوكه، جه يأكلها وقفت في زوره، شرق، غرق، مات، قضاء وقدر انتي كان نيتك سلمية، بهزر معاكي طبعا، قومي اعملي لجوزك طبق تين شوكي لوحده، وقشريله التين الشوكي وسيبيه ياكل لوحده وشيلي البذر من من التيناية بالملقاط بذرة بذرة قبل ما يأكله حتى لا يقف في حلقه».

جوزك مستحملك 12 سنة وساكت

وتابعت: «وبعدين إيديكي أي اللي انتي خايفة عليها من الشوك يا شيماء؟، انتي بتاكلي السمك البوري على بوق واحد وبتشفطيها، والسمكة بتفتكر نفسها في الأكوا بارك، تين شوكي أي اللي انتي خايفة منه؟، مانتي بتشكي في جوزك 12 سنة ومخافش منك ليه وساكت ومستحمل ولا عمره اشتكى».

وفي وقت سابق، قالت الإعلامية ياسمين عز، إنّه في حالة جوزك اتجوز عليكي، فإن الأفضل أن تسكني ضرتك في نفس المنزل حتى تقوم بخدمتك انتي وأبناءك، معلقة: «انتي تطبخي يوم وهي يوم، انتي تنكدي على جوزك يوم وهي يوم، لأن المثل بيقول إيد لوحدها متسقفش».

إيجابية تعدد الزوجات

وأضافت عز، خلال برنامجها «كلام الناس»، المذاع على شاشة قناة «إم بي سي مصر»، أنّ تعدد الزوجات هيخلي جوزك يوحشك، لو وحشك خير وبركة، لو موحشكيش لا يكلف الله إلا وسعها، اتطلقي يا مدام.

حلاوة البدايات

وتابعت: «لو جوزك فكر في يوم يتفضل عليكي ويخرجك ويفسحك فُسيح، في هذه الحالة لم تحتاجي إلى حضانة أو دادة أو بيبي سيتر، لأن ضرتك موجودة حية ترزق تقعد بالعيال تأكلهم وتشربهم وتلبسهم وتشيلهم هوبا على كتفها، تلف بيهم زي المروحة، وتسلطيهم عليها يجننوها ويبهدلوها ويشدوا شعرها، أطفال صغيرين هنعملهم أي، سلاحف لسه أحباب الله، عيالك متربوش يا مدام».