القصة الكاملة لخناقة إبراهيم فايق مع ناشطة "إكس" بعد ظهوره بقميص شيكابالا
اشتعلت منصات التواصل خلال الساعات الماضية بعد سجال حاد دار بين الإعلامي الرياضي إبراهيم فايق وإحدى الناشطات على منصة "إكس"، على خلفية ظهوره بقميص شيكابالا في حلقة برنامجه "الكورة مع فايق"، بعدما كان قد ارتدى من قبل قميص الأهلي.
الخلاف تفجّر بعدما اتهمت الناشطة فايق بالازدواجية في التعامل مع رمزيتي الأهلي والزمالك، معتبرة أنه أبدى "تحفظًا" عند ارتداء قميص الأهلي، مقارنة بـ"الراحة والظهور الفخور" بقميص شيكابالا، ما استدعى رده بتغريدة مطولة شرح فيها التفاصيل الكاملة للحلقتين وسياق ظهوره في كل منهما، مؤكدًا أن القميصين شرف له، وأنه تصرف عن قناعة واحترام لكلا الكيانين.
كتبت الناشطة في تغريدتها: "طبعا الجو في ميامي كان برد جدا فابراهيم لبس القميص فوق تيشيرت الأهلي عشان كان سقعان لكن هنا الجو حر فلابس تيشيرت الزمالك عادي كان اكرملك تقول لا على فكره لو مش عاوز تلبسه.. الكلمتين دول ليه ولغيره.. تيشيرت الأهلي يشرف اي حد .. وميتلبسش غصب".
إبراهيم فايق: قميص شيكابالا إهداء شخصي
وهو ما رد عليه فايق قائلًا: "ولا حر ولا برد ولا صهد.. انتي بس ماشوفتيش الحلقة وبالتالي مش عارفه السياق.. يعني اللي حصل انتي ماشوفتيهوش زي ناس كتير عملت بناء لنقدها من غير ما تشوف.. ومعنديش مانع اقولهالك لحد ما تشوفي الحلقة.. شيكا ادالي تيشيرت اعتزاله ممضي بتوقيعه وقالي ع الهوا.. تلبسه؟! طبعا يشرفني.. واخدت فاصل ورجعت لابسه وفوقه الجاكيت زي ما عملت قبل كده مع الأهلي (لابس الجاكيت وتحته التيشرت) بعدها ع الهوا زي ما عمل كابتن سيد عبدالحفيظ بضحك قالي شيكا اقلع الجاكيت.. فقلعته طول الفقرة.. ثم باقي الفقرات اللي بعدها لبست الجاكيت تاني فوق التيشيرت".
وأضاف: "شوفي أنا شرحت لك حاجة انتي المفروض كنت تشوفيها علشان بعدها تكتبي كلامك.. بس عادي مش مشكلة ادينا بنتكلم مع بعض.. الدنيا سهلة وبسيطة".
واختتم إبراهيم فايق تغريدته قائلًا: "نقطة أخيرة.. لما لبست تيشيرت الأهلي ده كان عن قناعة تامة لأن الأهلي هو اللي خلانا نروح أمريكا ونوصل للمستوى ده.. ثانيا ولأنه ممثل مصر الوحيد اللي مشرفنا وثالثا ده توجه وخط عام للقناة واضح لا لابس فيه.. تحياتي وأتمنى أكون وضحت يعني".
القصة الكاملة لخناقة "تيشيرت شيكابالا".. إبراهيم فايق في مرمى الانتقادات
لكن الناشطة عادت وردّت عليه قائلة: “ مساء الفل.. أولا انا معرفش حضرتك ليه افترضت اني مشفتش الحلقتين؟ وبنيت كلامك كله على اني واخده صوره وبعلق عليها بمنتهى السطحيه وخلاص؟ وحتى منزل تويته تانيه بصور تانيه انك لابس تيشيرت الأهلي ويتضحك!! ما انا شفت الحلقتين وعارفه تفاصيل اللي حصل في الحلقتين!! في ناس والله بتتفرج وبتتابع وبتعرف تركز في تفاصيل وتعلق وتقول وجهه نظرها مش كل اللي بينتقد حاجه سطحي ولا بينتقد وخلاص”.
وتابعت: "ثانيا: بما اني اتفرجت على الحلقتين فانا مصممه على كلامي فرق كبير بين رد الفعل في الحالتين .. بين حد قلع القميص بالحاح واتكسف حتى يقعد بيه ثانيه و وحد تاني بمنتهى الاريحيه والطلاقه قلع الچاكيت وقعد بالتيشيرت وكمل فقرته.. وهنا انا لا نيتي ولا معني كلامي اني اناقش انتماء حضرتك لانه حاجه تخصك لوحدك وقلتها قبل كده في كذا موقف والاكونت بتاعي موجود قدام حضرتك.. لا يعنيني انتماء ابراهيم فايق او غيره حتى لو طلع قال انا زملكاوي طالما بيدي الأهلي حقه ومش بييجي عليه وعلى لاعيبته له مني كل الاحترام والتقدير مش لازم يكون انتماءه زيي عشان اديله حقه! ثالثا: للمره التانيه الغرض من التويته بتاعتي لحضرتك ولاي حد تيشيرت الأهلي شرف لاي حد يلبسه.. اللي يلبسه لو هيبقى مكسوف وخايف من رد فعل حد ميبلسهوش بسيطه وسهله اهي.. الاهلي اكبر من ان قيمه التيشيرت تزيد او تقل عشان اى حد ايا كان مين لبسه.. تحياتي .. واتمنى اكون انا كمان وضحت وجهه نظري".
فايق ردّ مجددًا نافيًا "الكسوف" أو "التردد"، مؤكدًا: "وبرضه هنا انتي افترضتي اني مكسوف ومش عايز اقعد بيها دقيقة.. مع انك اتفرجتي على الحلقة وعارفة إن كنا بنختم الحلقة.. ولو كابتن سيد عمل كده بدري كنت هعمل نفس الموضوع وهكمل باقي الفقرة عادي.. لان تاني وأعتقد مش محتاج تكرار يشرفني اني لبست قميص الاهلي ولو أتكرر الحدث هعمل كده وانا مبسوط.. انتي اللي افترضتي اني مش مبسوط وحطيت صورة تحمل المعنى دها.. زي ما افترضتي برضه اني لبست قميص الزمالك وكملت.. مع اني لما خلصت الفقرة لبست الجاكيت في باقي الفقرات".
وأضاف: "أنا متفق معاكي ان لا احد يضيف لقميص الاهلي.. وهو غالي جدا عندي ولو عايزه تسمعيها وتتاكدي واكيد أضاف ليا وتصرفي كان تقدير كبير لدور الاهلي في تشريف الكرة المصرية.. الدنيا سهلة".
