نجوم ساندوا الفنانة شيرين عبد الوهاب بعد أزمتها في مهرجان «موازين»
أثار ظهور الفنانة شيرين عبد الوهاب في حفل ختام مهرجان موازين الدولي بالمغرب موجة من الجدل على مواقع التواصل الاجتماعي، وذلك بعد اعتمادها على تقنية “البلاي باك” في بداية الحفل، إلى جانب انتقادات طالت إطلالتها التي وصفها البعض بأنها “غير لائقة”. وبينما واجهت شيرين انتقادات حادة، تصاعدت في المقابل موجة دعم واسعة من جانب جمهورها وعدد من الفنانين الذين أعربوا عن تقديرهم لموهبتها ومكانتها الفنية.
عزيز الشافعي يساند شيرين عبد الوهاب
الفنان والملحن عزيز الشافعي كان من أوائل المتضامنين، حيث نشر صورة تجمعه بشيرين عبر حسابه على “إنستجرام”، واكتفى بكتابة اسمها إلى جانب رمز القوة، في رسالة تضامن صامتة لكنها مؤثرة.
وليد منصور يدافع عن شيرين عبد الوهاب
من جانبه، نشر منظم الحفلات وليد منصور رسالة مطولة دافع فيها بشدة عن شيرين عبد الوهاب، منتقدًا الهجوم الإلكتروني الذي طالها، وقال: “مستغرب جدا من ان في ناس قاعده تتكلم علي شيرين عبد الوهاب في حفل موازين اللي كل الجهات المنظمة هناك بتقولك اكبر عدد جماهيري في تاريخهم .. و مستغرب اكتر من شوية اللجان الفشلة اللي للأسف من ناس تابعه لفنانة متخيلة كده مثلا ان هتلغوش علي نجاح شيرين .. يا جماعه أنا بقالي ١٨ سنه شغال في شغلانه الحفلات ومع احترامي الكامل .. مصر مفيهاش غير شيرين عبد الوهاب واحدة .. طبعا في نجمات مصريات كبار جدا جدا بس شيرين عبد الوهاب الممثل الشرعي لصوت مصر في العالم .. شيرين لو روحت شارع شعبي تلاقي أغانيها .. لو روحت ديسكو هتلاقيها .. لو روحت ستاد هتلاقيها .. هي قدرت بصوتها واحساسها تكون صوت لجميع طبقات المجتمع .. سافر مع شيرين وشوف هتفهم هي فين و يا ريت بعيد عن اي أمور شخصية نفهم أن الفنانة دي حاله فنية صعب تحصل دايما .. أنا شايف شيرين ام كلثوم العصر الحديث .. أنا عملت ليها ٨٠٪ من حفلات مصر مفيش حفله مكنتش اعلي حفلة لفنانيه .. شيرين بنت البلد اللي هتفضل بفنها في حته لوحدها .. ف ياريت لما حد ينجح مندورش علي حاجات مضحكة ونقولها .. اصل كان في كام اغنيه بلاي باك علشان مرارتي بتتعب والنبي .. غنوا كل الاغاني بلاي باك و روني الجمهور هيفضل يغني كل اغانيكم وحفظنها زي شيرين .. شيرين طالعة من محنة وشرفتنا بجمهور فاق كل حاجه بدل ما ندعم قعدين نقول كلام غريب .. مبروك شيرين هتفضلي صوت مصر الحقيقي".
دفاع أيمن سليم عن شيرين عبد الوهاب
وفي السياق نفسه، دافع الإعلامي أيمن سليم عن شيرين عبد الوهاب، معتبرًا أن استخدامها للبلاي باك في بداية الحفل أمر مبرر في ظل حالتها الصحية. وقال في منشور عبر حسابه على موقع التواصل الإجتماعي فيسبوك: “لو بصينا لنص الكوباية الفاضي و قولنا هي شيرين لابسة كده ليه في حفلتها الأخيرة مش لاقية ستايلست يلبسها حاجة عدلة و إزاي بتغني بلاي باك مش لايف أومال عاملة حفلة ليه؟! .. لازم نبص لنص الكوباية المليان و هو إنها رفضت الأحاديث الإعلامية و ماغلطتش بكلام غير مسؤول كالعادة أثناء الحفل .. و رغم إنها مش في كامل لياقتها قررت تطلع و تشتغل و إختارت لبس يبدو غير مناسب .. لكن أفضل ما كانت تلبس حاجة ضيقة تبين إنها مش عارفة تخس أو تتكلم بطريقة غوغائية تخلي الناس تهاجمها .. و طلع البلاي باك أول فقرة في الحفلة بس و الباقي لايف .. واضح إنها ما زالت تعبانة و بتحاول تتعافى حتى لو ببطء .. رصيدها كبير و غني و يستحق إن الجمهور يدعيلها ترجع زي الأول و أحسن ”.
شيماء سيف تساند شيرين عبد الوهاب
بدورها، وجهت الفنانة شيماء سيف رسالة دعم عبر فيديو أظهرت فيه مقطعًا لشيرين تخطئ في كلمات أغنية ثم تعيدها مباشرة، وقالت: “الفيديو ده بيأكد إن شيرين مش بتغني بلاي باك .. هي نجمة كبيرة .. وكلنا ممكن نغلط .. اعتبروها متوترة لأنها بقالها فترة طويلة ما وقفتش على المسرح .. بقينا قاسيين قوي، وده مش عدل .. شيرين محتاجة دعم مش جلد. بحبك يا شوشو يا نجمة كبيرة”.
نوال الزغبي تعبر عن محبتها لـ شيرين عبد الوهاب
وجاءت نوال الزغبي لتدافع عن صديقتها شيرين عبد الوهاب، حيث قالت: “سلامة قلبك .. كنت حاسة فيكي قديش مشتاقة للمسرح وللجمهور .. وقديش كنت تعبانة نفسيًا وجسديًا .. ومع هيك جمهورك بيحبك .. ورح يضل حدك .. ودايمًا بقول صوت لن يتكرر .. كلنا بنحبك وحدك”.
هدى المفتي تحب مسلسل طريقي
بجانب الفنانة الشابة هدى المفتي، حيث ساندت شيرين عبد الوهاب بطريقتها الخاصة، فقالت: “أريد أن اكتب حبيبتي لا عزيزتي .. حتى يصبح خطابي وديًا .. أنا أحبك .. أحبك بشكل حقيقي .. أحب مسلسل طريقي .. وأحب آخر مشهد فيه .. وأنتِ تغنين بكبرياء ”لسه في الأيام أمل مستنينه" .. هذا المنشهد يجبرني على احترام إصرارك ومشوارك .. حتى لو كان مشهدًا تمثيليًا".
ورغم ما واجهته من هجوم، إلا أن موجة الدعم الواسعة أظهرت أن شيرين عبد الوهاب ما زالت تحظى بمكانة فنية خاصة لدى زملائها في الوسط الفني وجمهورها، الذين رأوا في ظهورها الأخير محاولة صادقة للعودة بعد فترة صعبة، مطالبين بتمكينها من استعادة وهجها الفني بهدوء ودون ضغوط.
