خاص.. من المسرح للهاوية: شيرين عبدالوهاب وضريبة الحب المؤذي

تقول خبيرة العلاقات صابرين جابر عن ظهور النجمة شيرين عبد الوهاب الأخير في مهرجان موازين وذلك خلال تصريحات خاصة لموقع “نيوز رووم”.

شيرين أمام الجمهور

وقالت “صابرين”: في حفلها الأخير بمهرجان “موازين”بالمغرب أطلت شيرين عبد الوهاب على المسرح أمام جمهور يحبها وينتظر منها لحظة طرب ووجع حلو مثلما عودتنا لكن واللي حصل كان وجع من نوع تاني… وجع بيحزن  أكتر ما يطرب  القلب أكتر ما يطبطب عليه.

شيرين كانت واقفة بس مش واقفة

وأضافت “صابرين” شيرين كانت واقفة بس مش واقفة… جسمها موجود لكن روحها غايبة صوتها تايه، نظرتها شاردة، وهي نفسها مش على طبيعتها والحقيقة؟ شيرين دي مش جديدة… دي شيرين اللي خرجت من علاقة سامة بكل تفاصيلها ولسه بتحاول تلملم بقاياها.

العلاقات السامة

العلاقات السامة مش لازم تكون فيها ضرب علني أو خيانة فاضحة ساعات بتكون في شكل “حب بيخنق” تحكم باسم الغيرة تلاعب نفسي، تقليل مستمر، وكلمات بتوجع أكتر من الضرب. 

العلاقة المؤذية

العلاقة المؤذية بتبدأ حلوة وبعدين  تسرق من الشخص نفسه صوته، شكله، ضحكته، وكرامته.

وأشارت شيرين واحدة من أقوى الأصوات في الوطن العربي لكن لما دخلت في علاقة مؤذية بدأنا نشوف تغيرات واضحة في كل حاجة فيها.

شيرين اللي كنا نحب عفويتها بقت بتعتذر كتير شيرين اللي كانت بتهزر وتغني من قلبها، بقت بتتكلم بخوف. شيرين اللي كانت بتملأ المسرح، بقت بتنسحب وتظهر وكأنها بتصارع شبح.

حفلة “موازين” كانت صدمة للكثير

وتابعت صابرين جابر: حفلة “موازين” كانت صدمة للكثير، لكن بالنسبة للبعض كانت لحظة فهم… إن اللي بيمر بعلاقة سامة مش بيرجع سهل مش بيقف على رجله تاني كأن حاجة ما حصلتش. الضربات اللي بتوجعنا جوا العلاقات المؤذية بتسيب أثر حتى لو احنا بنحاول نكمل ونبان كويسين قدام الناس.

شيرين مش بس فنانة هي كمان  إنسانة اتكسرت وانعدمت  الدرس ولسه بتحاول تقوم. واللي حصلها مش موقف شخصي وخلاص دي قصة ممكن تحصل مع أي حد فينا… بنت بتحب بصدق وتلاقي نفسها فريسة حب مؤذي.

الحقيقة إن العلاقات السامة مش بتسيب فينا جرح واحد دي بتعلم في كل حتة. بتعلم في روحنا، في نفسيتنا، في شغلنا، وفي صوتنا… وشيرين صوتها اختفى شوية، لكن يمكن لما تلاقي نفسها تاني، نرجع نسمع منها وجع حلو، مش وجع مؤلم.