زينب العبد تحذر من الذكاء الاصطناعي: "الموضوع بقى راعبني أنا شخصيًا"
خرجت الفنانة زينب العبد عن صمتها بشأن الذكاء الاصطناعي وتدخل شات جي بي تي في حياتنا بشكل مبالغ فيه، وذلك من خلال بث مباشر عبر حسابها الرسمي على موقع تبادل الصور والفيديوهات إنستجرام، حيث قالت خلال هذا البث: “في مرة أنا شخصيًا حد قالي كلام غير إنساني .. وأنا في الكلام ده مش بعرف أرد عليه .. وعشان جبلي تروما .. لاقتني دخلت شات جي بي تي وبسأله كان المفروض أرد اقول أيه .. فقالي كلام حلو أوي لدرجة أني ارتاحت نفسيًا لما سمعته .. ارتاحت لدرجة أني مبقتش عايزة أروح أقول حاجة للشخص اللي ضايقني .. لأن الرسالة راضتني من جوايا”.
وقائع حقيقية بخصوص شات جي بي تي
واستكملت الفنانة زينب العبد حديثها قائلة: “سمعت الصبح برنامج في الراديو .. المذيعة كانت بتتكلم أن في واحدة إيطالية كانت في علاقة فاشلة .. وكانت عايزة تنهي العلاقة دي فسألت شات جي بي تي تعمل ايه .. وساعتها خرجت من العلاقة دي وبدأت أنها تكلم شات جي بي تي .. لحد فترة ما بعد التخطي .. الموضوع عاملي رعب أنا شخصيًا .. بعد كده اتكلمت عن شخصية اسمها يوجين في الولايات المتحدة .. كان بردو خارج من علاقة وكان دايمًا بيتعامل مع شات جي بي تي في الحسابات والحاجات دي .. كان بيفيده جدًا .. ولكنه بدأ يتكلم معاه في مواضيع شخصية وبدأ يرد ويتعمق .. وبدأ ينعزل عن العالم ويسأل شات جي بي تي إذا كان العالم اللي أحنا عايشين فيه ده عالم موازي .. شات جي بي تي أكد المعلومة وأنه اه ممكن يكون عالم موازي .. وأنت لو بصيت هتلاقي كل حاجة حواليك مش طبيعية .. بدأ يتعمق أكتر وكان الشخص ده بياخد نوع مهدأ عشان ينمام .. شات جي بي تي قاله ياخد نوع تاني أقوى .. وبدأ يدخل في مرحلة هلاوس لدرجة أنه سأله أنا لو طلعت على سطح العمارة وأنا من جوايا مصدق أني هطير فهطير .. فقاله أه .. ولكنه فاق .. فسأله أنت ازاي بتحرضني على الانتحار .. قاله أنا اسف أنا غلطان بس دي مشكلة تقنية وابعت للشركة المختصة .. وأن كان في نسخة معمولة من شات جي بي تي لسحب الطاقة السلبية .. وأنه بيوافق على كل حاجة بنقولها".
عدم تعامل أشخاص غير أسوياء مع الذكاء الاصطناعي
واختتمت زينب العبد حديثها قائلة: " الموضوع بجد خطر أوي .. لأن أنا شخصيًا اتكلمت مع شات جي بي تي واداني إجابة بجد حلوة .. الفكرة كلها أن أي شخص مش مستقر نفسيًا مينفعش يتعامل مع شات جي بي تي”.
