محمد فارس عن بيع وسام أبو علي: مشروع الأهلي لا يحتمل التفريط في النجوم
حذّر الإعلامي محمد فارس، من التسرّع في بيع مهاجم الأهلي وسام أبو علي في فترة الانتقالات المقبلة، مؤكدًا أن اللاعب يمثل أحد أعمدة مشروع الفريق الحالي، وساهم بشكل مباشر في تحقيق البطولات الأخيرة.
وقال فارس، في تغريدة له عبر صفحته الرسمية بمنصة "إكس": "شوية دردشة كده عن فكرة بيع وسام.. الأهلي فريق هدفه الأساسي من أي لاعب بيضمه أو موجود في القائمة بتاعته هو تحقيق البطولات مش هدف تسويقي في الأساس لإن الأهلي مش نادي هدفه أنه يجيب لاعبين أسعارهم تزيد ويبيعهم بدون تحقيق الهدف الأساسي من ضمهم وهو البطولات".
وأضاف: "الأهلي بالبلدي لسه مأخدش خير وسام. أنت جبت زيزو وبن رمضان وتريزيجية عشان عندك مشروع محتاج على الأقل تحتفظ بالأسكواد بتاعك موسم كامل عشان تشوف نتيجة المشروع ده.. موضوع عرض ب ٥ ولا ٧ مليون دولار ده عرض مش كبير في الأرقام اللي بيدفعها الأهلي أساسا. والقصة مبتتحسبش كده وسام سبب الفوز بدوري ٢٠٢٤ هداف الدوري في نص موسم فقط ب ١٨ هدف وهو سبب الفوز بدوري ٢٠٢٥ ب ال ٨ اهداف اللي سجلهم في ال ٦ مباريات مع النحاس ولو حققت دوري الأبطال الموسم الجي ولو حقّقت إنتركونتننتال كل دي فلوس . اصلا وسام في ماتش بورتو جاب لك مليون دولار".
محمد فارس يحذر: فتح باب الرحيل
وتابع محمد فارس : "من بعد رحيل فلافيو صرفت قد ايه على مهاجمين أجانب كقيمة صفقة ورواتب ومحققوش حاجة !!!! . ما كل دي فلوس ..حد هيقول أصل اللاعب هيجي له راتب كبير برا ومش هيركز معاك ؟ . المبدأ لو اتفتح يبقى كل لاعب يجي له راتب برا اكتر مشيه بقى بغض النظر عن مصلحتك ! . اللاعب مرتبط بعقد لسه مستمر اكتر من موسمين.. مش معنى كده إن وسام مخطو ف جوا الأهلي أو مجبر لا . انت ممكن تعوضه بإعلانات وكمان تتفق معاه على فكرة انا محتاجك جزء أساسي في المشروع ده موسم كمان على الأقل . هنلعبها win win situationانت محتاج تركز الموسم اللي هتقعده عشان تحقق ليا اهدافي وكمان تحافظ على العروض اللي جايه لك".
واختتم الإعلامي محمد فارس تغريدته قائلًا: "أنا نفسي أشوف سكواد الأهلي ده كامل على الأقل موسم لأن المشروع ده هيفقد جزء كبير منه لو وسام رحل.. الحالة الوحيدة اللي ممكن اشوف فكرة بيع وسام فيها مطروحة لو عرض في حدود ١٢: ١٥ مليون دولار . هنا دي قيمة كبيرة لازم كمان تاخدها تستثمرها في مهاجم سوبر مش مهاجم تجربه لان مش كل التجارب هتنجح زي وسام اللي كمان له ميزة انه مش محسوب لاعب أجنبي".
