خبير تربوي لـ"نيوز رووم" يقدم نصائح ذهبية لطلاب الثانوية قبل امتحان الإنجليزي
نقدم مجموعة من النصائح العملية والسريعة لطلاب الثانوية العامة، قبل ساعات من امتحان اللغة الإنجليزية، المقرر صباح الغد،في تصريح لموقع “نيوزرووم”، قدمتها الدكتورة سهير سيد محمد، الخبيرة التربوية والتعليمية.
ووجّهت سهير رسالتها إلى لطلاب الثانوية العامة قائلة: "اللي فات مات، ومفيش وقت للندم، ركز في اللي جاي، وادخل الامتحان بثقة وربنا هيكرمك".
1. راجع سريعًا.. بس من غير توتر!
تقول د. سهير: "المذاكرة خلصت خلاص، الوقت اللي باقي دلوقتي راجِع فيه النقاط اللي شايف إنها محتاجة تقوية، أو اللي كنت بتنسى تفاصيلها بسرعة".
نصحت الطلاب الثانوية إنهم يبعدوا عن التوتر الزائد والمقارنات، ويشتغلوا على تحسين ثقتهم في نفسهم خلال الساعات المتبقية.
2. لو حسيت إنك نسيت كل حاجة.. متخافش
أكدت الخبيرة التربوية إن الإحساس بالنسيان قبل الامتحان شيء طبيعي جدًا، وأضافت: "أول ما تمسك ورقة الأسئلة، هتحصل واحدة من اتنين: يا إما تفتكر كل حاجة فجأة، أو تحس إن دماغك فاضية. في الحالتين،
المهم إنك تهدى، خد دقيقتين نفس عميق، وابدأ بالإجابات، هتلاقي المعلومات بترجع لك".
3. نام كويس.. بلاش سهر لآخر لحظة
"السهر مش بطولة"، هكذا شددت د. سهير، مشيرة إلى أن قلة النوم قبل امتحان الثانوية تؤثر بشدة على التركيز والأداء، ووجهت نصيحة مباشرة:
"نام بدرى، واصحى نشيط. عقلك محتاج يكون في أقصى درجات التركيز، مش أقلها".
4. انزل بدري وبلاش مناقشات مع الصحاب
أوصت د. سهير الطلاب إنهم يخرجوا بدري يوم امتحان الثانوية ، علشان يتجنبوا أي مفاجآت في الطريق.
وأضافت: "لما توصل اللجنة، ابعد عن التوتر والمناقشات مع الزملاء، ركز في مراجعتك بهدوء، وخليك في حالك".
5. خليك صاحب الوقت
من النصائح المهمة اللي قالتها: "خد معاك ساعة عادية، مش سمارت، وافردها على الديسك قدامك، وقسّم وقتك على الأسئلة، علشان متضيعش وقتك كله في سؤال واحد".
6. ابدأ بالأسهل.. ورتّب إجاباتك
شددت د. سهير على إن الطالب يبدأ بالإجابات اللي واثق فيها أكتر، علشان يكتسب ثقة مع أول سؤال ، وقالت: "أي سؤال تجاوبه، علم عليه في ورقة الأسئلة، علشان متنساش تراجع أو تكمل باقي الورقة".
7. التزم بتعليمات اللجنة.. وخليك في حالك
"اسمع كلام المراقبين، وركز في ورقتك بس"، هكذا اختصرت الخبيرة التربوية نصيحتها بشأن الالتزام داخل اللجنة.
وأضافت: "الغش مش بطولة، بل بالعكس، ربنا مش هيبارك في حاجة بدأت بالغلط".
8. بعد الامتحان؟ انسى كل حاجة وارتاح
أكدت إن من الأفضل بعد كل امتحان، إن الطالب مايراجعش الإجابات مع أصدقاءه.
"روح البيت، كل، نام، وابدأ مراجعة المادة الجديدة لما تصحى، المراجعة بعد الامتحان هتشتتك وهتقلل من طاقتك".
9. صلاتك ودعاء أهلك.. هما سر التوفيق
اختتمت الدكتورة سهير نصائحها برسالة دعم معنوية مهمة:
"خلي في بالك دايمًا إن ربنا بيكرم اللي بيجتهد، وبيبارك في دعاء الوالدين، اعمل اللي عليك واترك الباقي على الله".
