أحمد موسى: «الأهلي مشجعينه أكتر من جمهور مانشستر سيتي»
علق الإعلامي أحمد موسى خلال تقديم برنامج «على مسئوليتي» والمذاع عبر قناة «صدى البلد» على مباراة الأهلي اليوم؛ قائلا: «النهاردة الساعة 4 فجر هذا اليوم بتوقيت القاهره، النادي الاهلي كان بيلعب المباراة التالتة والأخيرة أمام بورتو البرتغالي، بورتو يا جماعه بطل أوروبا مرتين، بطل دوري أبطال أوروبا مرتين.
وأضاف الإعلامي أحمد موسى: «بطل البرتغال طبعا، الأهلي عمل أحلى مباراة، يعني هو مسك الختام بجد، 4-4 الماتش خلص كده، 8 أهداف في ماتش رائع جدا، الأهلي كان ممكن يخلص الماتش دا، الأهلي وأنت مغمض كده 6 أو 7 مقابل 4، مش هقولك 8 ولا 9، الأهلي ممكن يعمل نتيجة تاريخية أمام بورتو».
الأهلي ضيع 18 فرصة بـ18 جول
واستكمل موسى: «ضيعنا فرص غير مسبوقة، الأهلي ضيع فرص في الـ 3 ماتشات كان ممكن يبقى فيهم ياخد البطولة قبل ما يروح الدور التاني، فرص الأهلي ضيعها كان ممكن يسجلها، يعني الأهلي ضيع مثلا 18 فرصة كان ممكن يسجل 18 جول، شئ خيال يعني، لكن تحية، وتحية كمان جمهور الأهلي».
الأهلي مشجعينه اكتر من مانشستر سيتي
وأكد الإعلامي أحمد موسى: «الأهلي يا جماعة امبارح، الناس مستغربة، الاستاد مليان يا جماعة، كأنة استاد القاهرة ولا مختار التتش ولا استاد النادي الأهلي ولا برج العرب، دا مش أمريكا، يعني مش على بعد 11 ألف كيلومتر من القاهرة، النادي الأهلي جمهورة في أي حتة تجد النادي الأهلي، الأهلي مشجعينه أكتر من مانشستر سيتي، الأهلي أكتر من أي حد».
