محمود عامر يكشف لـ نيوز رووم حقيقة عدم وجود أعمال مناسبة له|خاص
أثار الجدل الفنان محمود عامر منذ أيام، بعدما نشر منشورًا يوضح فيه مدى استيائه من عدم وجود أعمال وفرص عمل للفنانين، وأن سوء معاملة بعض المنتجين والمخرجين عندما يطلب منهم الفنانين أن يشاركوا في أي عمل قادم، وتواصل موقع نيوز رووم مع الفنان محمود عامر لمعرفة ما القصة وراء ذلك المنشور، وما مدى صحة عدم إتاحة فرص عمل داخل المجال الفني.
محمود عامر: كنت بعبر عن زملائي
وقال محمود عامر في تصريحاته: “أنا مكنتش بتكلم عن نفسي في هذا المنشور .. كنت بتكلم بشكل عام لأن ده الواقع اللي بيحصل الفترة دي .. البعض أساء الفهم اني مش لاقي شغل وبدور على شغل وده مش صحيح .. البوست بيتكلم بشكل عام مش بيتكلم عني .. أنا راضي باللي ربنا قسمهولي تحت أي ظروف وفي أي وقت .. كلها أرزاق ومقسمها الخلاق .. مجيش أنا بقى اعترض على رزقي".
محمود عامر يوضح قصده من المنشور
واستكمل محمود عامر حديثه مع موقع نيوز رووم: " أنا كنت يومًا ما عضو مجلس نقابة المهن التمثيلية وعارف الزملاء والزميلات .. في ناس منهم بسبب بعدهم عن الفن لفترة أصبحوا بعيد عن بؤرة الأحداث .. ونظرًا لعدم وجود أماكن تلاقي بين الفنانين وباقي فريق العمل أصبحت طريقة التواصل الوحيدة هي أن الزميل بيبعت شغله للمنتج أو المخرج عشان يلاقي فرصة شغل .. كنوع من أنواع السعي بكرامة وبعزة نفس .. في ناس بترد وتساعد .. لكن في ناس تانية تقول إن شاء الله وتسكت .. أو تقول أنا بطلت شغل محدش يبعتلي .. وفي ناس بتتريق .. دلوقتي الموضوع بقى أوسع .. وبقى فيه بلوجرز وغيرهم من الشباب اللي بيدخلوا المهنة .. فبقيت أبواب العمل مقفولة أمام النجوم بتاعت زمان اللي مش عارفة تجاري الأحداث وتواكب متطلبات العصر .. أنا سميت الناس دي الموجوعين بالكرامة لأن الجيل القديم عكس الجيل الجديد .. الجيل الجديد بيدخل بصدره ومافيش حاجة بتهمه”.
ويُذكر أن الفنان محمود عامر قد عبر عن استيائه الشديد من قلة توافر الفرص للعمل، حيث خرج عن صمته في منشور خاص عبر حسابه الرسمي على موقع التواصل الإجتماعي فيسبوك منذ بضع أيام.
