معظم ممثلين مصر رفضوه... محمد دياب يكشف أسباب تأخير مسلسل «أشغال شقة»
عبر المخرج محمد دياب عن سعادته بنجاح مسلسل «أشغال شقة»، وكشف عن بعض الصعوبات التي وجهت شقيقه المخرج خالد دياب والمؤلفة شيرين دياب حتى يخرج المسلسل إلى النور.
وكتب محمد دياب عبر صفحته الرسمية بموقع فيسبوك: الحمد لله أشغال شقة للسنة التانية ينجح نجاح ساحق، بس ورا النجاح ده قصه.
«أشغال شقة»… معظم ممثلين مصر رفضوه
وتابع: أشغال شقة ده لمدة خمس سنين بيتعرض علي منتجين مصر كلهم و لكن مكانش فيه حماس ليه، تقريبا معظم ممثلين مصر رفضوه رجاله و ستات ، و لما مره نجم كبير تحمسله و مضاه فضل يطلب تغييرات لدرجه انه في الآخر طلب ان شغل البطل يتغير و تتشال فكره الشغالات.
وأشار " في ناس مكانتش عاجباها الفكره و ناس كانت شايفة اننا بنكتب جد فمش هنعرف نعمل كوميدي، و ناس عايزه الفكرة بس اللي يخرجها حد تاني غير خالد.
وأكد " رد الفعل ده كان هيجنن خالد وشيرين، احساس صعب لما تبقي مؤمن بحاجه و اللي حواليك مش شايفنها، ساعات ده بيشككك في نفسك.
واستكمل " اربع سنين تعدي و مينزلش لخالد و شيرين أي مشروع، الضغط خلي خالد يقبل أن «أشغال شقة» يتعمل و لو بمخرج تاني ، خالد لأي حد يعرفه هو اكتر انسان كوميدي تقدر تعرفه و انا و شيرين كان عندنا قناعه انه من اشغال شقه هيطلع كوميديته الخاصه اللي هتكسر الدنيا.
وأضاف " بصعوبة شديدة رجع خالد و شيرين يحاولوا ورا المسلسل، لغاية لما جه هشام ماجد اللي آمن بيه و بخالد كمخرج و جت شركه الأنتاج (اي برودسيرز) اللي هيأتله اسباب النجاح.
واكد " أشغال شقة نجح و استخدم توليفه كتابيه مختلفه مش قايمة عالإيفيهات، و خالد كمخرج طلع عنده صوت و شخصية و رؤية بصريه باينة في كل مشهد، انا طول عمري بتفرج علي كوميديا المسلسلات و ابتسم كام مره و ابقي مرضي، بس ان الواحد يضحك بصوت و لغايه لما بطنه توجعه و ده يحصل كل حلقه، فمتخيلتهاش تحصل في مسلسل.
واختتم “ بالنسبالي المخرج و المؤلف الشاطرين هما اللي بيعملوا حاجه احس اني معرفش اعملها و انا لما بتفرج علي اشغال شقه ببقي متأكد اني معرفش اعمل منه مشهد ، فعلاً كل تأخيره و فيها خيره ”.
طاقم عمل مسلسل أشغال شقة
يذكر أن مسلسل «أشغال شقة» من بطولة الفنان هشام ماجد و أسماء جلال و شيرين و سلوي محمد على و مصطفي غريب و محمد عبدالعظيم و أحمد عبدالوهاب و ومن تأليف خالد دياب، وشيرين دياب، وإخراج خالد دياب.
