منة القيعي: 7 جوائز ونجاح كبير رغم الأزمة الصحية والتحديات
أعربت الشاعرة منة القيعي، عن سعادتها البالغة بتكريماتها المتتالية عن أعمالها في رمضان 2025. ونشرت صورة تجمعها بجميع الجوائز التي حصدتها عبر حسابها الرسمي على موقع تبادل الصور والفيديوهات "إنستجرام"، وعلقت عليها موضحة ما مرت به من أزمات، حيث قالت: "بوست طويل وحكاية ماكنتش ناوية أحكيها.. بس هحكيها.. من ٧ شهور وإحنا لسة بنسخن عشان نحضر لشغل رمضان.. حسيت بصعوبة في التنفس كانت بتزيد كل يوم إلي أن تحول الموضوع لنوبات اختناق تقريبا.. كانت بتتسبب في تسارع في ضربات القلب توصل لـ ١٨٠ و١٩٠".
أزمة صحية وحادث
واستكملت منة القيعي: "وأوقات كتير الموضوع كان بيطول.. كنت بحس أني مش هعديها .. بعد شهر واتنين من الفحوصات والتشخيصات المختلفة .. جالي نوبة من دول وأنا سايقة وتسببت في حادثة كانت صعبة شوية .. راحت فيها عربيتي والحمد لله برضه نجوت منها بإصابات خفيفة وكنا بنحمد ربنا ألف حمد .. بعدها الامور تدهورت أكتر.. والنوبات كانت بتوصل لمرتين و٣ و٥ في اليوم الواحد.. وابتديت رحلة علاج طبيعي للتنفس.. وكنت حرفيا بتعلم إزاي أتنفس من الأول، واليوم اللي كنت بتنفس فيه "صح" لدقيقة متواصلة كنت بعيط من الفرحة.. ويوم بيعدي ويوم أحس إنه مابيعديش لحد ما وصلنا لهنا".
عمل رغم الألم
وأوضحت منة القيعي: "الـ ٧ شهور دول هما اللي ربنا كرمني فيهم بالأغاني دي .. صاحبي يا صاحبي .. وكل سنة .. وتقابل حبيب .. إلخ .. اللي اتكتبت وأنا في مستشفي واللي اتكتبت وأنا على جهاز التنفس واللي اتكتبت وأنا بعيط .. فيه أيام من الاحباط كنت بفكر أبطل أحاول أخف .. بس عمري ما فكرت أبطل كتابة .. وكنت بدعي ربنا يكرمني ويجازيني .. وكنت بكلمه وأقوله يارب وقفني .. ووقفني على رجلي تاني .. اللهم لك ألف حمد وشكر".
جوائز منى القيعي
وأعربت منة القيعي عن سعادتها بما توصلت له، حيث قالت: “٧ جوايز حصيلة ٧ شهور مروا بكرم الله ولطفه .. فيه جايزتين مش معايا .. شكرا لأهلي وعيلتي وجوزي وصحابي والناس اللي اشتغلت معاهم كلهم .. طلعت عنيكوا وقلقتكوا وعملتلكوا ازعاج .. واستحملتوني .. شكرا من كل قلبي”.
