على غير المتوقع.. إخصائية تغذية: "كُل عشان تخس".. سر خسارة الوزن في الشبع
يعتقد الكثيرون أن التوقف عن الأكل هو الطريقة الأسرع لـ خسارة الوزن، ولكن الحقيقة مختلفة تمامًا، تقول الدكتورة روبي مرزبان، إخصائية التغذية العلاجية وإدارة الوزن، إن الجسم لا يعمل بهذه الطريقة، "كل عشان تخس" هو الشعار الذي ترفعه، لأن الامتناع عن الطعام يؤدي إلى نتائج عكسية.
توضح أن الحرمان من الطعام لا يؤدي إلى خسارة الوزن بل يضر الجسم، ويضع الجسم فيما يسمى "وضع المجاعة".
أهمية الثلاث وجبات يوميًا
لما حد بيجيلي في العيادة وبيقولي "أنا مش باكل طول اليوم علشان أخس"، أول حاجة بوضحها إن ده أكبر غلطة، الجسم محتاج طاقة عشان يشتغل بكفاءة، ولما نحرم نفسنا من الأكل، إحنا بنبعت للجسم إشارة خطر، الحل مش في تقليل الوجبات، بل في تنظيمها.
أنصح دائمًا بتناول ثلاث وجبات رئيسية يوميًا، مع ترك فترة لا تقل عن 5 ساعات بين كل وجبة والتانية، ده بيساعد في تنظيم معدل الحرق و خسارة الوزن، لكنه كمان بيمنع الجسم من الدخول في ما يُعرف بـ"وضع المجاعة".
ما هو وضع المجاعة؟
الناس بتتكلم كتير عن "وضع المجاعة"، بس قليل اللي فاهمين معناه الحقيقي، لما نقلل السعرات اللي بناكلها لفترة طويلة جدًا، الجسم بيدخل في حالة دفاع عن النفس، بيبدأ يقلل معدل الحرق ويوفر الطاقة اللي عنده، عشان يحافظ على نفسه من الجوع الحقيقي.
ده اللي العلماء بيسموه "التوليد الحراري التكيفي"، يعني الجسم بيتكيف مع الحالة الجديدة ويقلل من استهلاك الطاقة، المفارقة إننا ممكن ناكل أقل بس ما نخسش، وأحيانًا كمان نزود وزننا!
هل وضع المجاعة خطر؟
وضع المجاعة كان مفيد للإنسان زمان وقت المجاعات، لكن دلوقتي في عصر وفرة الطعام، بقى يضر أكتر ما ينفع، الجسم بيختزن الدهون بدل ما يحرقها، وده بيأثر سلبًا على محاولات خسارة الوزن.
كمان، الدخول في وضع المجاعة ممكن يسبب إرهاق، دوخة، مشاكل في الهرمونات، وضعف عام، يعني مش هنخس، لكن صحتنا كمان هتتأثر.
نصيحتي ليك: كل بذكاء عشان تخس بفعالية
الحل مش في الجوع، لكن في الأكل الذكي، اختار وجبات متوازنة فيها بروتين، ألياف، دهون صحية، واشرب مياه بانتظام، الجسم محتاج وقود عشان يشتغل، ولما نوفر له اللي يحتاجه، هنلاقي فرق واضح في الوزن والطاقة والمزاج كمان، وخسارة الوزن.
