مالكة عقار في طنطا: "مستأجر سرقني ومش عارفة أدخل بيتي بسببه" |خاص
عندي بيت ومش عارفة أدخله.. ده يرضي ربنا"، هكذا بدأت “بسنت” مالكة عقار في طنطا قصتها، مؤكدة وجود خلافات مع مستأجر بنظام الإيجار القديم، الأمر الذي اضطرها للانتقال للعيش في الإسكندرية خوفًا من تفاقم الأمور بشكل أكبر، ما يُنذر بكارثة.
كشفت “بسنت” في تصريحات خاصة لـ"نيوز رووم"، معاناتها مع الإيجار القديم، وأكدت أنها تُعاني بسببه، مطالبة بتعديل القانون حتى يستعيد المُلاك حقوقهم المهدورة، وقالت: “لديّ بيت 4 أدوار في طنطا، الأرضي والتالت والرابع بتوعي، وفي واحد مستأجر الدور الأول علوي، الشقة كانت بتاعت والده وقاعد فيها بحكم الامتداد”.
معاناة مع المستأجر
وتُضيف: “المستأجر مدمن وعنده حوالي 35 سنة وقاعد مع زوجته وأولاده، سرق 3 شقق بتوعي، وشال البوابة الحديد، وكسر الشقق وسرق العفش وكل حاجة جوه، وزوجته بتساعده في كل تصرفاته، كان في بواباب حديد على السلم من أول الدور التاني عشان نأمن الشقق بتاعتنا، واحنا نازلين من السطح على الرابع في بوابة تانية”.
وتابعت “بسنت”: “سرق البوابتين وكسر سور السلم وسرق الشبابيك الحديد، في 2023 عملنا محضر سرقة العفش واتحبس شهر على ذمة التحقيقات، وبعد كده خرج براءة لعدم اكتمال الأدلة، وبعد خروجه الوضع بقى صعب أكتر من الأول، وسرق تاني من البيت ووصل الأمر لسرقة الحنفيات والشقق غرقانة وبهدل الشقق”.
“مش عارفين نقعد في الشقق ولا نأجرها”
وأكدت مالكة العقار أنها لا تستيطع الإقامة في الشقق، وقالت: “ولا عارفين نقعد ولا نأجرها وعملنا محضر تاني، وبعد فترة اتمسك بالصدفة وهو بيسرق محل واتسلم للقسم، وسرقنا في المرة التانية أكثر من أول مرة، ولما جيت رايحة أنا ووالدتي بعد القبض عليه زوجته قافلة بوابة العمارة مش عايزة حد يدخل وقالت محدش يجي هنا وشدينا سوا وروحنا القسم نعملها محضر”.
وواصلت “بسنت”: “وبعدين رجعنا نطلب النجدة لقيتها قاعدة وصوتت وبتقول إن احنا طلبناها والباب مفتوح ومش منعانا، مرة تانية قالت للناس دي بتقفل علينا المياه، الأمر تطفيش، وفي مرة تالتة بتقولي أنتوا بتحبسوا جوزي ليه قولتلها عشان سرق، ردت (سرقنا وبنسرق وهنسرق وده بيتنا لو تقدري تيجي البيت هنا تاني تعالي وأنا أقطعلك رجلك وأمشي من هنا)”.
واستكملت: “عملتلها محضر اغتصاب حيازة بس متابعتش المحضر في سبتمبر الماضي، بعد كده حصلي ظروف مرض ابني وتفاجأت من يومين أنه شال أبواب الشقق والغرف وفي ناس أصدقائه قاعدين فيها، والدي راح عشان يشوف الوضع وقال للناس تمشي من بره مدخلش طبعًا عشان المشاكل بس هما قالوله ده بيت الولد ده وهو مقعدنا قالهم هتصل بالنجدة خافوا ومشيوا، مش عارفين رجعوا ولا لا مش عارفين الوضع".
سرقة الممتلكات وشقة تمليك للخروج
وشددت “بسنت” على أنها لا تستطيع الذهاب إلى البيت إطلاقًا، حتى عندما ذهب والدها كان من الخارج وكنا متأكدين أنه ليس بالداخل، وأضافت: “نخاف من الاحتكاك معه وزوجته مستقوية وبتساعده، مفيش حد في البيت غيرهم، حاجتي كلها راحت، خايفة يولع في البيت، هروح لوحدي أعمل ايه؟، ممكن يعمل فيا حاجة”.
وأوضحت أن هذا البيت كان ملكًا لجدتها، ثم تم بيعه إلى خالها، قبل أن تشتريه، وتابعت: “مستفادتش حاجة، حاجتي اتسرقت ومش عارفة ادخل بيتي.. عندي بيت لكن مش عارفة ادخله في حاجة كده، طول ما هي في البيت مش قادرين نروح، لو الناس اتدخلت وقدرت ادخل البيت بتعمل أي حوا، وبتقول للناس ده بيتنا وقالتلي الشقة دي زي التمليك أوعي تفتكري إنك هتخرجينا منها في يوم”.
وأضافت: “قالتلي هاتيلي شقة تمليك، وأنا أطلع بره، اجيب لها منين الشقة معدية المليون.. اجيب منين؟، ده سارق حاجات بأكثر من 500 ألف جنيه عفش كامل وأجهزة كهربائية والبوابات والشبابيك”.
خروج من البيت والانتقال للإسكندرية
ولفتت “بسنت”، إلى أنها كانت مقيمة في هذا البيت، قبل أن تضطر لتركبه إجبارًا، وقالت: “أنا كنت مقيمة في البيت ده بس حماتي كانت عاملة عملية كبيرة وقعدت معاها 6 شهور، جيت أرجع لقيت الأوضاع دي معرفتش ارجع تاني فضلت في الإسكندرية، أخد البيت خلاص وبياخد اللي هو عايزه”.
أضرار الإيجار القديم
وأشارت “بسنت” إلى أن الإيجار القديم سبب معاناتها، وأن ما يحدث معها واحدة من أضرار القانون، مضيفة: “المشكلة بسبب القانون والمفروض العقد يتفسخ لو وقع ضرر على المالك، ولكن لما سألت محامين قالولي السرقة مش هتطلعه ملهاش علاقة.. استنى يقتلني ولا ايه؟”.
واختتمت تصريحاته الخاصة قائلة: “الحاجة الوحيدة اللي تطلعه يحصل ضرر في شقته هو غير كده مش هعرف اطلعه، المفروض يحصل تعديل في قانون الإيجار القديم ولو وقع ضرر على المستأجر من المالك يحق للمالك فسخ التعاقد، ازاي يسرقني ويقعد في بيتي؟.. ياريت سرقة بس ده واخد البيت كله”.
