مستأجر في العتبة: أروح فين ببناتي وشقتي للعيلة كلها |خاص

قبل ساعات على اجتماع المستأجرين في البرلمان لمناقشة مشروع قانون الإيجار القديم، أبدى محمود يسري أحد المستأجرين في منطقة العتبة، رفضه لخروج المستأجرين من الشقق والمحلات، مؤكدًا أن الشقق القديمة مفتوحة أمام العائلة بأكملها.

وتعقد اللجنة المشتركة من لجان الإسكان والمرافق العامة، والإدارة المحلية، والشئون الدستورية والتشريعية بمجلس النواب والمعنية بمناقشة مشروعي القانونين المقدمين من الحكومة بشأن الإيجارات القديمة اجتماعًا للاستماع إلى المستأجرين اليوم الاثنين، حول مشروع القانون.

شقة الإيجار القديم مفتوحة للعائلة

وتحدث محمود يسري لـ"نيوز رووم"، عن أزمة مشروع قانون الإيجار القديم، قائلًا: "احنا مش بنحب نتكلم ولا عايزين نظهر، بس مضطرين نعمل كده عشان ده حقنا يعني احنا هنروح فين ومصيرنا هيكون ايه؟، احنا عايشين هنا وشغالين هنا وحياتنا كلها هنا، ازاي مرة واحدة نمشي".

ويروي محمود قصته قائلًا: "أنا مستأجر سكني في العتبة وتجاري أيضًا عندي ورشة، والاتنين كانوا بتوع أبويا الله يرحمه وده أول امتداد، والشقة الإيجار القديم أنا متجوز فيها مع أمي قبل ما تتوفى وعندي بنتين دلوقتي، ولسه أخويا الصغير قاعد معايا أنا وزوجتي في نفس الشقة".

وأضاف: "دي تعتبر شقة عيلة، صحيح أنا اتجوزت فيها ومقيم هناك على طول، بس أي واحدة من أخواتي البنات بيحصل عندها مشكلة بتيجي عندي على طول، عندي 3 أخوات بنات منهم واحدة مطلقة وأنا فاتحها ليها ولأي واحدة منهم طبعًا، دي شقة أبويا شقتي أنا وأخواتي مش أنا بس، ولسه أخويا الصغير معايا لدلوقتي يخرجونا منها ازاي هنروح فين".

تفاصيل جلسة الملاك في البرلمان 

وعقدت اللجنة المشتركة اجتماعًا مع الملاك الأحد في البرلمان، وكشف مصطفى عبد الرحمن رئيس ائتلاف ملاك العقارات القديمة التفاصيل، وقال: "النواب منحونا فرصة كويسة، وأسعدني إن محمد عطية الفيومي قدمني وقال نصًا أعلن إليكم الأستاذ مصطفى بيه عبد الرحمن رئيس ائتلاف ملاك العقارات القديمة وممثلًا عن ملاك مصر، ودي حاجة جامدة وكلام حلو في حقي".

وأضاف رئيس ائتلاف ملاك العقارات القديمة في تصريحات خاصة لـ"نيوز رووم": "كنت أول المتحدثين من الملاك، وكان موجود 5 آخرين بجانبي ممثلين عن الملاك، وهم؛ جوليا محمد وأحمد شحاتة، بالإضافة إلى 3 آخرين لا نعرفهم، وقالوا كل واحد من الملاك هيتكلم 10 دقائق ودي مدة حلوة، وبعدها بيكون التعقيب".

واستكمل مصطفى عبد الرحمن: "النتائج هتبان بعدين، لأن لسه في جلسة مع المستأجرين، وبعد كده النواب هيجتمعوا تاني، ولكن الجلسة كانت محترمة، وأنا والملاك مبسوطين خدنا راحتنا في الكلام وكان في تجاوب معنا".

واختتم مصطفى عبد الرحمن تصريحاته الخاصة بالتأكيد على سعادته بالجلسة وتفاؤله بالمرحلة القادمة وخروج القانون إلى النور، قائلًا: "مجلس النواب يُسطر تاريخًا ومعاملة جديدة في تعديلات قانون الإيجار القديم، نحن متفائلين وننتظر تعديلات القانون، وعودة الحقوق لأصحابها".