يحيى الموجي يكشف مفاجأة بشأن زواج عبد الحليم حافظ من سعاد حسني
كشف الموسيقار يحيى الموجي حقيقة زواج الفنان الراحل عبد الحليم حافظ من سندريلا الشاشة العربية سعاد حسني، حيث نشر عقد الزواج العُرفي، الذي نشرته أسرة الراحلة سعاد حسني عبر حسابه الرسمي على موقع التواصل الإجتماعي فيسبوك، وعلق عليه قائلًا: “مفيش حيرة ولا حاجة .. واضح أن العقد ده مزور .. علشان مكتوب في اخره جمهورية مصر العربية .. عام 1960 .. وفي الوقت ده كان اسمها الجمهورية العربية المتحدة .. صح كلامي”.
بيان أسرة عبد الحليم حافظ
وقد نشرت أسرة عبد الحليم حافظ بياناً رسميًا تنفي فيه زواج العندليب من السندريلا، وجاء كالتالي: "مر على وفاتك يا حليم حوالي نصف قرن .. والناس لسه بتسأل هل الإشاعة عن جوازك حقيقية ولا لأ؟ .. يا حليم أنت أعظم واحد غنيت للحب .. ومن وجهة نظري ده كان بسبب حرمانك منه من أول حب الأم اللي اتحرمت منه يوم ولادتك .. لحد الحرمان من حب الزوجة والأبناء عشان في ناس كتير بتحب تتشهر .. وخصوصًا لما أضواء الشهرة عندها بتقل وتتطفي .. فيجيبوا سيرتك عشان يرجعوا تاني في دايرة الضوء .. إشاعات كتير طلعت وأنت عايش منها الإشاعات اللي كانت بتقول أنك بتتدعي المرض علشان تنال تعاطف الجمهور .. وإن نزيفك علي المسرح كان كذب .. ولما سافرت في أخر رحلة علاج طلعت الإشاعة اللي بتقول إن حليم بيتدعي أنه مسافر لندن للعلاج .. وهو بيتفسح ويلف العالم ورجعت بعدها مصر في تابوت .. وأخرست ألسنة كل اللي كانوا بيقولوا أنك بتمثل .. وبتتدعي المرض .. إشاعة الجواز اللي طلعت بعد وفاتك بـ17 سنة من ناس المفروض أنهم كانوا أصدقائك .. واستمرت الإشاعة بدون أي مستند أو دليل .. وكان نفسي ألاقي حاجة تنفيها بدليل قاطع .. أنا كنت عارف ومتأكد إنك متجوزتش لأنك كنت عايش لأهلك وفنك .. ومرضك خلاك تخاف تتجوز وتظلم معاك زوجة وأبناء .. وكفاية عيلتك إللي عاشوا معاك قساوة مرضك وده اللي أكدتهولي أمي .. وقبلها جدتي علية الله يرحمهم ويحسن إليهم .. احنا كأسرة عمرنا ما جرينا ورا تريند أو شهرة زائفة أو تاجرنا بأخبار كاذبة .. وبنحترم نفسنا وبنحترم جمهورك العريض في العالم كله ومحبيك .. وبنلتزم الصمت وبنحاول دايماً نحافظ علي سمعة وسيرة الأسرة الطيبة .. ولما بنتحدث أو بننفي أي إشاعات أو أخبار لازم يكون معانا دليل أو حاجة تثبت صحة كلامنا للحفاظ على مصداقية العائلة .. وحب الناس واحترامهم لينا يجبرنا أننا منقولش حاجة إلا لو متأكدين منها بنسبة 100٪".
