"خيانة".. رامي رضوان ينتقد نشر جواب سعاد حسني لعبد الحليم حافظ

علق الإعلامي رامي رضوان علي قيام أسرة الفنان الراحل عبد الحليم حافظ بنشر جواب للعندليب والفنانة الراحلة سعاد حسني. 

وكتب رامي رضوان عبر حسابه بموقع فيسبوك:" نشر خطاب سعاد حسني لعبد الحليم حافظ، خيانة، خيانة من أسرة العندليب له وللسندريلا بل وجريمة في حقهما.. من فعل ذلك غير آمن على ما تركه حليم".

وتابع" خطاب خاص وكلمات ومشاعر شديدة الخصوصية..لم يفصح عنه ابدا حليم..وقرر أن يظل سرا..فمن أعطى ورثته حق نشره وفضح  خصوصيته؟! عيب جدا جدا، ربنا يرحم الرمزين العظماء  ويحفظ سيرتهما". 

بيان أسرة عبد الحليم 

ونشرت الأسرة جوابًا بخط يد سعاد حسني تنفي من خلاله زواج العندليب:"عدى على وفاتك يا حليم حوالي نصف قرن والناس لسه بتسأل هل الإشاعة عن جوازك حقيقية ولا لأ؟، يا حليم أنت أعظم واحد غنيت للحب ومن وجهة نظري ده كان بسبب حرمانك منه من أول حب الأم اللي اتحرمت منه يوم ولادتك لحد الحرمان من حب الزوجة والأبناء عشان في ناس كتير بتحب تتشهر وخصوصًا لما أضواء الشهرة عندها بتقل وتتطفي فيجيبوا سيرتك عشان يرجعوا تاني في دايرة الضوء".

شائعات إنك بتتدعي المرض

وتابعت الأسرة في بيانها "إشاعات كتير طلعت وأنت عايش منها الإشاعات اللي كانت بتقول أنك بتتدعي المرض علشان تنال تعاطف الجمهور وإن نزيفك علي المسرح كان كذب ولما سافرت في آخر رحلة علاج طلعت الإشاعة اللي بتقول إن حليم بيتدعي أنه مسافر لندن للعلاج وهو بيتفسح ويلف العالم ورجعت بعدها مصر في تابوت وأخرست ألسنة كل اللي كانوا بيقولوا أنك بتمثل وبتتدعي المرض".

وأضاف البيان :" إشاعة الجواز اللي طلعت بعد وفاتك بـ17 سنة من ناس المفروض أنهم كانوا أصدقائك وأستمرت الإشاعة بدون أي مستند أو دليل وكان نفسي ألاقي حاجة تنفيها بدليل قاطع، أنا كنت عارف ومتأكد إنك متجوزتش لأنك كنت عايش لأهلك وفنك، ومرضك خلاك تخاف تتجوز وتظلم معاك زوجة وأبناء وكفاية عيلتك اللي عاشوا معاك قساوة مرضك وده اللي أكدتهولي أمي وقبلها جدتي علية الله يرحمهم ويحسن إليهم".

واستكمل البيان:"احنا كأسرة عمرنا ما جرينا ورا تريند أو شهرة زائفة أو تاجرنا بأخبار كاذبة وبنحترم نفسنا وبنحترم جمهورك العريض في العالم كله ومحبيك، وبنلتزم الصمت وبنحاول دايماً نحافظ علي سمعة وسيرة الأسرة الطيبة ولما بنتحدث أو بننفي أي إشاعات أو أخبار لازم يكون معانا دليل أو حاجة تثبت صحة كلامنا للحفاظ علي مصداقية العائلة وحب الناس وأحترامهم لينا يجبرنا أننا منقولش حاجة إلا لو متأكدين منها بنسبة ١٠٠٪".