محمد شبانة: فيلم بصوت عبد الحليم حافظ ويكشف تفاصيل علاقته بسعاد حسني|خاص
أكد محمد شبانة، نجل شقيق الفنان الراحل عبد الحليم حافظ أنهم يستعدون لطرح عمل ينتمي إلى نوعية دوكودراما أو دراما وثائقية يتناول قصة حياة العندليب وعلاقته بالفنانة الراحلة سعاد حسني.
وتحدث "شبانة" عن الجدل المُثار هذه الأيام بشأن زواج عبد الحليم حافظ وسعاد حسني، وقال ضاحكًا في تصريحات خاصة لـ"نيوز رووم": "احنا زهقنا من قصة عبد الحليم حافظ وسعاد حسني نعمل فيلم ابن خالة كيلوباترا".
عمل دوكودراما بصوت عبد الحليم حافظ
وأضاف محمد شبانة في تصريحات خاصة لـ"نيوز رووم: "نُخطط لإعادة تقديم فيلم ومسلسل عن حياة عبد الحليم حافظ في المستقبل، لأن الأعمال اللي اتقدمت قبل كده مكانتش مظبوط، وكنا غير راضيين عنها، لأنها لم تتناول قصة عبد الحليم حافظ بالحقائق والشكل المنتظر".
وكشف نجم شقيق عبد الحليم حافظ، أنهم يستعدون لإطلاق عمل جديد، وقال: "نُحضر لعمل دوكودراما عن قصة حياة عبد الحليم حافظ بصوته، حاجة بين الوثاقي والدراما، وسيتم طرحها في عيد ميلاده أو ذكرى وفاته عندما تنتهي شركة الإنتاج منها".
وتابع "شبانة": "سيكون ضمن الأحداث كلام بصوت العندليب عن سعاد حسني، احنا نزلنا جواب منها الأيام اللي فاتت وهي بتقول فيه يا عبد الحليم أنت بتكرهني ومش بتحبني، ده بينهي علاقة مكانتش جواز.. في حد بينهي علاقة جواز بجواب، هما متجوزوش".
العمل يتناول علاقة العندليب وسعاد حسني
وواصل نجل شقيق عبد الحليم حافظ حديثه قائلًا: "بعض الناس بررت وقالت إنه مش خطها ومش مصدقين، خلاص هننزل الكلام بصوت عبد الحليم حافظ بنفسه عشان ننهي القصة دي خالص".
واختتم محمد شبانة تصريحاته الخاصة قائلًا: "أول مرة الناس تشوف الجواب ولكن اضطررنا أن نُخرجه بعد كثرة الكلام، كنا لا نُريد نشره خاصة أن الاثنين توفاهم الله، ولكننا لجأنا لذلك حتى نُنهي هذه الشائعة".
بيان أسرة عبد الحليم حافظ
أسرة عبد الحليم حافظ كانت قد نشرت بياناً رسميًا تنفي فيه زواج العندليب، وجاء كالتالي: "دي على وفاتك يا حليم حوالي نصف قرن والناس لسه بتسأل هل الإشاعة عن جوازك حقيقية ولا لأ؟، يا حليم أنت أعظم واحد غنيت للحب ومن وجهة نظري ده كان بسبب حرمانك منه من أول حب الأم اللي اتحرمت منه يوم ولادتك لحد الحرمان من حب الزوجة والأبناء عشان في ناس كتير بتحب تتشهر وخصوصًا لما أضواء الشهرة عندها بتقل وتتطفي فيجيبوا سيرتك عشان يرجعوا تاني في دايرة الضوء".
وتابعت الأسرة في بيانها: "إشاعات كتير طلعت وأنت عايش منها الإشاعات اللي كانت بتقول أنك بتتدعي المرض علشان تنال تعاطف الجمهور وإن نزيفك علي المسرح كان كذب ولما سافرت في أخر رحلة علاج طلعت الإشاعة اللي بتقول إن حليم بيتدعي أنه مسافر لندن للعلاج وهو بيتفسح ويلف العالم ورجعت بعدها مصر في تابوت وأخرست ألسنة كل اللي كانوا بيقولوا أنك بتمثل وبتتدعي المرض".
وأضاف البيان: "إشاعة الجواز اللي طلعت بعد وفاتك بـ17 سنة من ناس المفروض أنهم كانوا أصدقائك واستمرت الإشاعة بدون أي مستند أو دليل وكان نفسي ألاقي حاجة تنفيها بدليل قاطع، أنا كنت عارف ومتأكد إنك متجوزتش لأنك كنت عايش لأهلك وفنك، ومرضك خلاك تخاف تتجوز وتظلم معاك زوجة وأبناء وكفاية عيلتك إللي عاشوا معاك قساوة مرضك وده اللي أكدتهولي أمي وقبلها جدتي علية الله يرحمهم ويحسن إليهم".
وجاء في ختام البيان: "احنا كأسرة عمرنا ما جرينا ورا تريند أو شهرة زائفة أو تاجرنا بأخبار كاذبة وبنحترم نفسنا وبنحترم جمهورك العريض في العالم كله ومحبيك، وبنلتزم الصمت وبنحاول دايماً نحافظ علي سمعة وسيرة الأسرة الطيبة ولما بنتحدث أو بننفي أي إشاعات أو أخبار لازم يكون معانا دليل أو حاجة تثبت صحة كلامنا للحفاظ على مصداقية العائلة وحب الناس واحترامهم لينا يجبرنا أننا منقولش حاجة إلا لو متأكدين منها بنسبة 100٪".
