انتهاء أزمة مدخت تيخا والمنتج عوض ماهر بعد تدخل أشرف زكي

أعلن الفنان مدحت تيخا، عن انتهاء أزمته مع المنتج عوض ماهر، وذلك بعد تدخل الدكتور أشرف زكي، نقيب المهن التمثيلية.

وشارك مدحت تيخا عبر حسابه الشخصي على فيسبوك، صورته مع أشرف زكي وعوض ماهر، وعلق : “بحمد الله وفضله ثم فضل الأب والضهر والسند بعد ربنا سبحانه وتعالى، نقيبنا وأستاذي ودكتوري دكتور أشرف زكي".

وتابع تيخا : "تم الصلح بيني وبين المنتج عوض ماهر، وتم دفع المبلغ المتبقي داخل النقابة بفضل الله ثم الدكتور أشرف زكي، ربنا يحفظه ويخليه لينا جميعًا، والحمد لله رب العالمين".

وكان قد كشف مدحت تيخا تفاصيل أزمته مع المنتج عوض ماهر، بسبب المستحقات المتأخرة ، كما أعرب عن استيائه من هجوم الفنانة عفاف مصطفى عليه بعد حصوله على حكم ضد المنتج عوض ماهر بالحبس لمدة 6 أشهر على خلفية تحرير شيك بدون رصيد ، مشيرا إلى أنه سامحها أمام الله لأنه قام باعتبارها في سن والدته .

وقال تيخا خلال فيديو قام بنشره عبر صفحته الشخصية عبر فيسبوك : “حق الرد على أزمة الشيك والمنتشرة خلال الأيام دي والنهاردة تحديدًا ، أولًا الشيك ده بقاله 3 سنين، أنا صابر ومستني بقالي 3 سنين عشان أعرف آخد حقي".

وتابع مدحت تيخا : "ومن شهر اكتشفت إن الشيك مدته هتسقط بعد أيام، فكلمت الأستاذ وقولتله لو سمحت اديني فلوسي، فقال مفيش فلوس كالعادة طبعًا على مدار 3 سنين ، قولتله طب جددلي الشيك، اعمله بتاريخ جديد تاني عشان 2026 بدل 2023 عشان أستناك تلات سنين كمان، يبقى أنا كدة مستني ست سنين ، أظن أنا عداني العيب وأزح زي ما بيقولوا يعني”.

وأضاف مدحت : “وأنا مكنتش مختار إن أنا أرفع قضية ، أولًا أنا أول مرة أرفع قضية في حياتي، أنا عمري ما بعادي حد ولا عمري حتى لو اتنصب عليا بقول فوضت أمري لله وربنا موجود ، ولكن أنا لجأت للقضاء عشان أضمن حقي وأضمن فلوسي اللي اشتغلت بيها، فأول ما أنا عملت كدة هو معجبوش، وفجأة أول ما عرف إن أنا رفعت قضية ، شتايم على الواتساب وأسوأ الألفاظ، عمري ما كنت أتخيل إن عشان بطالب بحقي ألاقي كدة”.

وأكمل : "واللي فوجئت بيه النهاردة وضايقني أوي على مواقع التواصل الاجتماعي، على فيسبوك تحديدًا، إن في زميلة بتهاجمني بأسوأ الصفات وأسوأ الكلام، وأنا لا تربطني بيها أي علاقة لا من قريب ولا من بعيد ، أنا مش عارف هي بتعمل فيا كدة ليه؟ يمكن عشان بطالب بحقي؟ وبعدين ده حكم محكمة، انتوا بتعترضوا على حكم المحكمة؟

وواصل تيخا : “أنا لجأت للقانون لإننا في دولة قانون، والحمد لله المحكمة حكمتلي، فأنا ده حكم محكمة، أنتم بتعترضوا على حكم المحكمة ؟، أنا اخترت أسامح كل اللي شتمني وكل اللي أساء ليا، رغم إن أنا مش عارف، أنتم مفروض زملائي، مش عارف أنتوا بتهاجموني ليه؟”.

كما قال مدحت تيخا : “بدل ما تقفوا جنبي بتهاجموني مش عارف ليه ، ولكن أنا اخترت إن كل اللي شتمني وكل اللي خاض في عرضي احتسبته عند ربنا ومسامح حضرتك، ومسامح كل اللي شتمني عندك لوجه الله، خصوصًا لما لقيت صورة حضرتك وعرفت إن حضرتك في سن والدتي فـأنا مسامحك”.

واختتم مدحت تيخا : “بشكر دكتور أشرف زكي لاحتواء الموقف، وبشكر شعبان سعيد محامي النقابة، وحبيت أوجه بس التوضيح ده للسادة الصحفيين ولكل الوسط الفني إن الشيك ده بقاله تلات سنين وكنت مستني تلات سنين كمان بس هو اللي مرضيش، عشان كدة لجأت للقضاء.. شكرًا”.