"لو خدت فلوسي هتصالح".. أول تعليق من مدحت تيخا عن أزمته مع المنتج |خاص
كشف الفنان مدحت تيخا عن سماحه لكل من أساء له خلال الأيام الماضية بسبب أزمته مع المنتج عوض ماهر، ومن بين المسيئين إليه الفنانة عفاف مصطفى، ولكن أوضح أنه لن يتنازل عن حقه ومن الممكن أن يتصالح مع عوض ماهر في حالة استرجاع أمواله فقط، وذلك في تصريحات خاصة لـ موقع نيوز رووم.
القصة الكاملة لأزمة مدحت تيخا والمنتج عوض ماهر
في سياق آخر، قد حرص الفنان مدحت تيخا على كشف وتوضيح الحقيقة الكاملة لأزمته مع المنتج عوض ماهر بشأن أزمة المستحقات المتأخرة ، كما أعرب عن استيائه من هجوم الفنانة عفاف مصطفى عليه بعد حصوله على حكم ضد المنتج عوض ماهر بالحبس لمدة 6 أشهر على خلفية تحرير شيك بدون رصيد ، مشيرا إلى أنه سامحها أمام الله لأنه قام باعتبارها في سن والدته .
وقال مدحت تيخا خلال فيديو قام بنشره على صفحته الشخصية على موقع التواصل الاجتماعي فيس بوك : حق الرد على أزمة الشيك والمنتشرة خلال الأيام دي والنهاردة تحديدًا ، أولًا الشيك ده بقاله 3 سنين، أنا صابر ومستني بقالي 3 سنين عشان أعرف آخد حقي ، من شهر اكتشفت إن الشيك مدته هتسقط بعد أيام، فكلمت الأستاذ وقولتله لو سمحت اديني فلوسي، فقال مفيش فلوس كالعادة طبعًا على مدار 3 سنين ، قولتله طب جددلي الشيك، اعمله بتاريخ جديد تاني عشان 2026 بدل 2023 عشان أستناك تلات سنين كمان، يبقى أنا كدة مستني ست سنين ، أظن أنا عداني العيب وأزح زي ما بيقولوا يعني.
وأضاف: وأنا مكنتش مختار إن أنا أرفع قضية ، أولًا أنا أول مرة أرفع قضية في حياتي، أنا عمري ما بعادي حد ولا عمري حتى لو اتنصب عليا بقول فوضت أمري لله وربنا موجود ، ولكن أنا لجأت للقضاء عشان أضمن حقي وأضمن فلوسي اللي اشتغلت بيها، فأول ما أنا عملت كدة هو معجبوش، وفجأة أول ما عرف إن أنا رفعت قضية ، شتايم على الواتساب وأسوأ الألفاظ، عمري ما كنت أتخيل إن عشان بطالب بحقي ألاقي كدة، واللي فوجئت بيه النهاردة وضايقني أوي على مواقع التواصل الاجتماعي، على فيسبوك تحديدًا، إن في زميلة بتهاجمني بأسوأ الصفات وأسوأ الكلام، وأنا لا تربطني بيها أي علاقة لا من قريب ولا من بعيد ، أنا مش عارف هي بتعمل فيا كدة ليه؟ يمكن عشان بطالب بحقي؟ وبعدين ده حكم محكمة، انتوا بتعترضوا على حكم المحكمة؟
مدحت تيخا يلجأ للقانون
وتابع : أنا لجأت للقانون لإننا في دولة قانون، والحمد لله المحكمة حكمتلي، فـ أنا ده حكم محكمة، أنتم بتعترضوا على حكم المحكمة ؟ أنا اخترت أسامح كل اللي شتمني وكل اللي أساء ليا، رغم إن أنا مش عارف، أنتم مفروض زملائي، مش عارف أنتوا بتهاجموني ليه؟ بدل ما تقفوا جنبي بتهاجموني مش عارف ليه ، ولكن أنا اخترت إن كل اللي شتمني وكل اللي خاض في عرضي احتسبته عند ربنا ومسامح حضرتك، ومسامح كل اللي شتمني عندك لوجه الله، خصوصًا لما لقيت صورة حضرتك وعرفت إن حضرتك في سن والدتي فـأنا مسامحك.
واختتم مدحت تيخا حديثه قائلاً: بشكر دكتور أشرف زكي لاحتواء الموقف، وبشكر شعبان سعيد محامي النقابة، وحبيت أوجه بس التوضيح ده للسادة الصحفيين ولكل الوسط الفني إن الشيك ده بقاله تلات سنين وكنت مستني تلات سنين كمان بس هو اللي مرضيش، عشان كدة لجأت للقضاء.. شكرًا.
