نجلة مديحة كامل: والدتي لم تصاب بورم وتوفت بشكل مفاجئ

كشفت ميريهان نجلة الفنانة الراحلة مديحة كامل، عن تفاصيل مرض والدتها، قائلة: «والدتي في فترة تعبت وجالها روماتويد وكانت بتتعالج بأدوية فيها كورتيزون وده زودها في الوزن جدا».

وتابعت، خلال استضافتها في برنامج «الستات» المذاع عبر شاشة النهار، مع الإعلامية سهير جودة: «بعد شوية الروماتويد وصل للقلب وفضلت فترة تتعالج، ثم ببقت كويسة 100% وراح ورجعت لوزنها الطبيعي وكل شيئ كان كويس وسافرت مع والدها الحج».

كما أكدت أنها لم تصاب بأي أورام، قائلة: «هي لم تصاب بأي نوع من الأورام ودي كانت شائعة، هي توفت لوحدها بشكل مفاجئ بسبب هبوط حاد في الدورة الدموية».

وواصلت: «مديحة كامل اتعرض عليها تقدم برامج دينية على أكثر من قناة لكنها رفضت تماما ولما بعدت عن الفن بعدت بشكل نهائي، وهي عاشت حاجات كتير صعبة في حياتها أولهم وفاة أخوها الصغير ووفاة عمر خورشيد لأنهم كانوا زي الأخوات.. كمان أمي شافت حادث عمر خورشيد وهو بيطير من العربية وبيخبط في العمود وبعدين بيتدبح بإزاز العربية وده كان شيئ قاسي».

كما تطرقت للحديث عن مديحة كامل كأم، قالت: «كانت أم صارمة وكان ليا مواعيد رجوع للبيت مكنتش بقدر أتأخر عن الساعة 8 ومرة تانية اتأخرت لـ 9 ونص ضربتني قلم كسرلي سناني.. وهي رفضت إني أسافر أدرس خارج مصر، لكنها في المقابل كانت أم حنونة جدا وكويسة وبتدلعني وعمرها ما استخسرت فيا حاجة».

كما كشفت ميريهان عن تفاصيل حول حياة والدتها الراحلة، موضحة أنها كانت جدة تحب أحفادها للغاية، قائلة: «في بداية ولادتي ابني يوسف كانت غيرانة ني مهتمة بيه ومش مهتمة بيها.. لكن أول ما تم 3 شهور مبقتش تسبهولي».

شائعات عن علاقتها بوالدتها

وعن الشائعات التي ترددت عن لسناها أضافت: «في شائعات طلعت إني بقول إن علاقتي بيها مكانتش أحسن حاجة.. لكن الكلام ده مش حقيقي خالص وحسبي الله ونعم الوكيل أنا علاقتي بيها كانت قوية جدا وكويسة».

وتابعت: «أمي عمرها ما قصرت معايا خالص بالعكس أوقات كتير كانت بتسيب التصوير علشان تجيلي المدرسة وكانت بتاخدني معاها الاستوديو علشان تذاكرلي بين المشاهد».