أسما شريف منير تكشف عن أشياء تعلمتها بصعوبة |التفاصيل
كشفت الإعلامية أسما شريف منير عن أشياء في حياتها قد تعلمتها بصعوبة، وحرصت أن تنصح الجمهور كيف يتخطوها، وذلك من خلال منشور عبر حسابها الرسمي على موقع تبادل الصور والفيديوهات إنستجرام.
أسما شريف منير تكشف عن أشياء صعبة في حياتها
حيث قالت أسما شريف منير معلقة: “ حاجات اتعلمتها بالطريقة الصعبة اوي اوي كمان، متستناش لما تبقى جاهز، إحساس إنك جاهز ممكن ميجيش أصلاً. ابدأ وخلاص، الالتزام أهم من الحماس، لأن الحماس بيروح وييجي، إنما الالتزام هو اللي بيخليك تكمل، اختار نفسك كل مرة. إنك تختار نفسك مش أنانية، ساعات بيكون ضرورة، مينفعش تفضل تدي للناس وإنت مفيش فيك حاجة تديها، اتكلم ومتفضلش طول الوقت بتحاول ترضي الناس. مش لازم كل الناس تحبك، خليك واقف ورا حاجة مؤمن بيها، وسيب وراك حاجة ليها معنى، الغلط جزء من الرحلة. غلطاتك مش هي اللي بتحدد إنت مين، المهم تتعلم، تعدّل وتكمّل، مش كل حاجة معمولة عشان تفضل. الناس بتتغير، الأماكن بتتغير، والمراحل بتخلص، ساعات لازم حاجة تمشي عشان تعمل مكان لحاجة أحسن، حافظ على سلامك النفسي. مش كل حاجة تستاهل طاقتك، اتعلم تقول لأ، تحط حدود، ومتتراجعش عنها كل ما حد يزعل، الاستمرارية هي اللي بتكسب. خطوات صغيرة كل يوم ممكن تعمل فرق أكبر من دفعة حماس كبيرة كل فترة، خليك طيب، بس مش لازم تبقى متاح لكل حاجة ولكل حد، ممكن تبقى شخص كويس وفي نفس الوقت تحافظ على وقتك وطاقتك.”.
نصائح أسما شريف منير لجمهورها
واستكملت أسما شريف منير نصائحها قائلة: “مش كل معركة لازم تبقى معركتك، ساعات وإنت بتتغير وبتكبر هتحس إنك لوحدك، لأن مش كل الناس هتفهم إنت بتعمل إيه أو ليه. وده عادي، كمّل برضه، وإنت بتسعى لبكرة أحسن، متنساش تعيش النهارده. الحياة مش مستنياك توصل، هي بتحصل دلوقتي، كل مرحلة بتطلع منك نسخة أهدى، أقوى وأوعى، ولسه بنتعلم، ولسه بنتغير، ولسه بنكبر”.
