في بداية مشوارها.. ماذا قالت عبلة كامل للفنانة رحمة أحمد؟
تحدثت الفنانة رحمة أحمد، عن مشاركتها ونجاحها في مسلسل 80 باكو، الذي عُرض في السباق الرمضاني الماضي 2025، بجانب الحديث عن حياتها الشخصية وكشفها تفاصيل مكالمتها مع الفنانة عبلة كامل، وذلك خلال لقائها في أحد البرامج التلفزيونية.
أبرز تصريحات رحمة أحمد
- الفنانة عبلة كامل كلمتني على تليفون أشرف زكي، وادتني نصائح وباركتلي وهي بتتعامل كأم وقالتلي أنوع فـ أدواري، وهي فنانة قديرة وقدوة.
- كنت خايفة من دوري في مسلسل 80 باكو، لأن الانتقال من الكوميدي لـ التراجيدي والعياط يا يبقى حلو أوي يا يبقى مش حلو.
- جزء كبير من مشهد السرقة كان ارتجال، والمخرجة دورت الكاميرا وسابتنا وانتصار كانت مرعبة.
- اتدربنا قبل التصوير في كوافير في الدقي، وعلمتنا نعمل الشعر والحواجب، واللي فاجئني العلاقات الإنسانية بين البنات في الكوافير الحقيقي.
- شخصية عبير في 80 باكو، مؤلمة وفي ستات مبتطلقش علشان معندهاش القدرة المادية بالرغم من أنها بتضرب في بيتها.
- ابني مصطفى مشافش مشهد الضرب الحمد لله.
- اتأثرت نفسيًا جدًا بمشهد السرقة وقعدت أعيط لوحدي في الكرفان، ومش قادرة أتخيل الستات اللي بتعيش ده في الحقيقة، يعني نفسيتي تعبت من مذاكرة دور الستات اللي دي حياتها تعمل إيه.
- بشوف أن مش مهم يكون عندك كام في البنك ولا بيوت قد إيه المهم تكون متعلم وعندك شهادة، لأنك لو اترميت في الشارع هتعرف تجيب لقمة تتعشى بيها.
- أنا مش مؤمنة خالص أن الست تصرف على الراجل، ومش المفروض تصرف على نفسها وهي متجوزة، والعيال مسؤولية الأب تمامًا، وممكن الست تساعد لو اللي قدامها يستاهل.
- بقلق أوي من الزوج اللي بعد فترة يجيب لبس جديد أو بيرفيوم جديد، بتعرفي أن في حاجة، ومبشوفش أن في ست غبية وبتعرف كل حاجة وهي قاعدة مكانها دي حاجة إلهية.
- كان في لجان إلكترونية كتير من وقت الجزء السابع لمسلسل الكبير أوي، واتخضيت أوي وعيطت شوية وبعد كده فهمت ودي ضريبة وجانب من جوانب النجاح.
- مبفهمش يعني إيه سينما نظيفة ومش نظيفة، واللي أنا متأكدة منه أني لا أملُك أني أحكم على أي تصرف لفنان أو فنانة وعمري ما هعمل كده.
- زعلت أول لما شفت انتقادات ريهام عبد الغفور، دي قمر، ليه تعملوا كده؟ اعتبروها من عيلتكم دي فنانة وعاملة دور مهم جدًا في مسلسل ظلم المصطبة.
- ترتيب الأسماء على التتر مش من اختصاص الفنان دي ترجع لإدارة الأعمال ونظرتهم.
- جالي اكتئاب وحصلي سدة نفس، ودي سبب خسارة وزني وفي ناس قالت أني عملت تكميم معدة، ولكني خسيت الوزن اللي زيدته في الحمل والرضاعة.
