وئام مجدي تتحدث عن دورها في أهل الخطايا: "أكني باخد كورس تمثيل"
حلت الفنانة وئام مجدي ضيفة في برنامج أون سيت المُذاع على قناة اون، وتحدثت خلال الحلقة عن كواليس دورها في مسلسل أهل الخطايا وتعاونها مع الفنان جمال سليمان.
وئام مجدي في مسلسل أهل الخطايا وتعاونها مع جمال سليمان
حيث قالت وئام مجدي خلال لقاءها: “كنت كأني باخد كورس تمثيل .. أستاذ جمال بيركز في كل حاجة .. ساعات مكنتش ببقى عايزة أقول المكتوب .. كان يقولي لا قوليها زي ما هي مكتوبة عشان توصلي الإحساس أنك حبيبة أبوكي أوي .. ولما نقلب على بعض .. يبان ويبقى في مبرر للي حصل بعدين .. أنا جالي الدور و اتقالي أن أنا البنت الكبيرة لأستاذ جمال .. و اتحكتلي القصة .. قعدت أقول أن عايزة أعمل دور شر .. و بعدين حبيت النقلة من كونها حبيبة أبوها لـ أنها علطول في تحدي معاه .. كانت تجربة حلوة جدًا ليا .. و أستاذ جمال بيدي إضافة لأنه مركز معاكي .. و بشوش أوي .. و مثقف جدًا .. و بيدي ثقة أوي للي قدامه”.
كواليس مشهد القتل في مسلسل أهل الخطايا
تحدثت الفنانة وئام مجدي عن كواليس مشهد القتل، وقالت: “أنا عمري ما عملت مشهد قتل .. فأنا أول ما دخلت وبيتقالي هيحصل أيه .. ببص ملاقيتهاش السكينة اللي بتدخل لجوا دي .. لاقيتها بلاستيك .. فروحت قولتلهم هو في أيه .. بس أستاذ جمال عمل تكنيك في المشهد .. أنه قلبها لجوا فبقيت إيده هي اللي خابطة فيا .. ضربني في مشهد أكتر من مرة .. بس قبل ما اعمل المشهد ده أنا كنت بضحك أوي .. وعمالة أفكر طب هعمل ايه .. أنا عمري ما عملت مشهد قتل خالص .. ومش عايزة اكون أوفر وعمالة أقول لا أنا مش هعمل كده .. طب اموت وأنا ساكتة .. مش منطقي بردو محدش هيضرب بالسكينة من غير ما يصوت حتى .. وهو بيقولي أنتِ اللي قتلتي ولدي .. وأنا مش عارفة أقول أيه .. بس هو حرفي أوي .. هو مقاليش حاجة .. بس أداني نظرة كده .. اللي هو ركزي بقى .. دخلني في الموود .. ومن أول مرة قالي تحفة عملتيها طبيعية جدًا .. أنا بخاف من الأوفر”.
