مأساة عم رضوان مسن المنيا: "مراتي وولادي رموني في الشارع بعد 40 سنة شقا"

رصد موقع "نيوز رووم" حالة إنسانية لـ"عم رضوان"، وهو رجل يبلغ من العمر 68 عاما من محافظة المنيا، يعيش في الشارع ويفترش كنبة قديمة بعد أن أصبح بلا مأوى، إثر تخلي أسرته عنه، وفق روايته.

كنت ميسور الحال وفنيت حياتي على ولادي

وروى عم رضوان قصته قائلاً: "إحنا كنا ميسورين الحال والحمد لله، لكن حصلت لنا ظروف.. كان عندنا محل، واضطريت أسيبه عشان الحالة تعبت.. أخدت ولادي ورحنا القاهرة، واشتغلت هناك، والدنيا بدأت تمشي وبقينا تمام".

وتابع: "كنت بشتغل 12 في اليوم وكنت ميسور الحال، وفنيت حياتي كلها على ولادي، معايا 4 بنات صرفت عليهم دم قلبي وجوزتهم، وفي الآخر محدش منهم عارفني.. طردوني".

غدر الزوجة وجحود الأبناء

وأوضح عم رضوان أنه وثق في زوجته وكتب لها أملاكه: "كان عندي شقة في البلد بعتها وكتبتها باسم الزوجة، وبعد كدة حصلي ظرف طارئ اللي هو غضروف، ودلوقتي طردتني وعملتلي خلع بعد ما كتبتها باسمها ورموني في الشارع".

وأضاف: "كل الناس دلوقتي زي ما أكون جربان، محدش متحملني، حتى ابن أخويا عايز يطردني من البيت اللي كان ليا فيه 2 متر وبعته.. الكل هرب مني بعد ما كنت ميسور الحال والناس كلها كانت بتحترمني".

معاش لا يكفي العلاج ونداء للمسؤولين

ويصف عم رضوان معاناته اليومية مع المرض والفقر، حيث يعاني من انزلاق غضروفي حاد يمنعه من الحركة إلا بعكاز، قائلا: "معاشي على قد الحال، معاش ما يسقيش ماية.. معاش 1500، واحد بياخد 1500 يعمل بيها إيه؟ لا عارف أجيب علاج ولا عارف آكل منها ولا أشرب، والنهارده هنام في الشارع".

واستغاث إلى رئيس الجمهورية، ومحافظ المنيا، ووزارة التضامن الاجتماعي: "أنا بناشد المسؤولين والقلوب الرحيمة، عايز أي حاجة أتعايش بها، حتة حيطة أتدارى فيها، أوضة وصالة أعيش فيها وأعمل فيها حمام بدل ما بعمل حمام في الشارع دلوقتي.. حرام والله العظيم".