فيدرا تهاجم شخص بسبب تصويره فيديو لهجوم مجموعة كلاب على قطة وقتلها
خرجت الفنانة فيدرا عن صمتها لتهاجم أحد الأشخاص المتابعين لها، ووصفته بلا إنسانية بسبب تصويره لهجوم كلاب على قطة وقتلها، وذلك من خلال مقطع فيديو لديها عبر حسابها الرسمي على موقع التواصل الإجتماعي فيسبوك.
فيدرا تهاجم أحد الأشخاص بسبب مقتل قطة
وعلقت فيدرا قائلة: “لو حد كاتب بوست مش عاجبني مبردش، في واحد عندي دايمًا بيكتب بوستات مستفزة بالنسبالي كمحبة للحيوانات، نزل فيديو لكلاب بتهجم على قطة وبتقتلها، بس دي طبيعة الحال بينهم، هو بقى واقف بيصور وكاتب أنا كنت عايز أنقذها بس الكلب الأبيض اللي ورا منعني، زقك يعني ولا عملك ايه، ده أنت لو رميت طوبة على كلاب في المدينة بيجروا، سيبتهاغ تموت وكنت واقف تصور شئ طبيعي بيحصل في العالم كله، أنت أهم حاجة عندك أنك تثبت للعالم بصوا الكلاب الوحشة، أنت فين يا جميل يااللي مش شراني، ده غير الأذى النفسي اللي أثرت بيه على الناس بسبب الفيديو ده، ما هي ماتت خلاص، اللي فارق معايا بجد هو: إزاي إنسان يقف يتفرج على روح بتتقتل، ويقول “حاولت وما قدرتش”، وهو في نفس الوقت واقف بيصور بكل هدوء؟، الأهم عنده إنه يثبت وجهة نظره، حتى لو الثمن كان روح بتتقتل قدامه، فيه فرق كبير بين إنك توثق حدث، وإنك تختار تبقى متفرج على المأساة، انت مش صح، انت مؤذي لينا كلنا.”
تعليق فيدرا على طريقة إدارة الحوار في البرامج
في سياق آخر، قد هاجمت الفنانة فيدرا طريقة إدارة الحوار في اللقاءات، خاصة بعد اللقاء الذي أثار الجدل مؤخرًا في برنامج الحكاية الذي يقدمه الإعلامي عمرو أديب، وذلك من خلال مقطع فيديو عبر حسابها الرسمي على موقع تبادل الصور والفيديوهات إنستجرام.
وقالت فيدرا في الفيديو: “أنا في العموم بتحاشى أني اتفرج على لقاءات فيها قضايا لأن لغة إدارة الحوار بتبقى سيئة، لما نتكلم عن قضية تهمك أنت شخصيًا بيحاولوا يستفزوك بكل الطرق، لو مناظرة بتبقى إدارتها زي الزفت، لو البرنامج هوا فكرة أنك تمنتجوا مش واردة، رجاء من المسئولين عن البرامج واللي بيديروا الحوار يختاروا ضيف ميبقاش جاي يفرد عضلاته، جاي يتناقش بجد مش جاي يهاجم، هو مش حرب هو حوار على هيئة مناظرة، بتكون إدارتها مش سهلة إلا لو معاك ضيوف مبيتغظوش بسهولة، ودايما بيكون في واحد موجود عشان ينرفز اللي قدامه، علشان يحصل مشاجرة ويطلعوا تريند، أحنا مش بنعمل تريندات عايزين مشاهدة محترمة للناس”.
