بعد الهجوم الأخير على المنتخب المصري.. عبلة سلامة تحذر: "دي لجان إلكترونية"
حذرت الإعلامية عبلة سلامة جمهورها من بعض اللجان الإلكترونية التي تهاجم المنتخب المصري بعد خروجه من بطولة كأس العالم 2026 بسبب رفع علم فلسطين، إلي جابن بعض التعليقات من بلدان مختلفة تشمت في المصريين، وذلك من خلال منشور لها عبر حسابها الرسمي على موقع تبادل الصور والفيديوهات إنستجرام.
عبلة سلامة تحذر من اللجان الإلكترونية
حيث قالت عبلة سلامة في منشورها: “يا جماعة، بالله عليكم ما تخلوش حد يضحك عليكم، إحنا كلنا شفنا الأيام اللي فاتت فيديوهات وصور ورسائل من كل الدول العربية. شفنا شعوب، وإعلاميين، وصحفيين، وحتى مسؤولين، فرحانين من قلبهم لما مصر كسبت، وزعلانين لما مصر خسرت. والله كانت مشاعر جميلة ومحترمة، وفرحتني جدًا، فما يجيش واحد مجهول، ولا حساب معمول مخصوص، يخليني أكره شعب عربي كامل أو يشككني في محبته لمصر، دي لجان إلكترونية، ودي بقت معروفة، في حسابات كتير شغلتها إنها توقع بين الشعوب العربية، وتوقع المصريين في بعض، وتنشر الكراهية والفتنة، تلاقي الاسم عربي، وتدخل على الحساب تكتشف إنه فاضي، أو معمول من كام يوم، أو مفيهوش أي حياة طبيعية. ولو ركزتوا في التعليقات، هتلاقوا نفس الجمل ونفس الألفاظ بتتكرر بشكل يلفت النظر، وكأنها منسوخة. وساعات الاتهامات نفسها تبقى مالهاش أي علاقة باللي بيتقال، فتحس إن اللي كاتبها بيكرر كلام جاهز وخلاص. راقبوا تكرار التعليقات، وادخلوا على الحسابات قبل ما تنفعلوا، وفيه بقي ناس مش عايشين في مصر، ولا يعرفوا عنها حاجة. المهم عندهم إنهم يزرعوا الإحباط ويفككوا الناس. خلوكم أذكى من كده، وما تسيبوش حد يوجه وحتى لو فيه شخص حقيقي كتب كلام يضايقك، فهو بيمثل نفسه، مش بيمثل شعب كامل، ما ينفعش نعمم، وما ينفعش نخلي تعليق واحد يمحي كل الحب اللي شفناه بعنينا، اللجان دي شغلتها الفتنة وتفكيك الشعوب”.
واختتمت عبلة سلامة حديثها قائلة: “إحنا أكبر من كده، وأوعى تسيبوا حد يسرق منكم الصورة الجميلة اللي شفناها الأيام دي، حب العرب لمصر حقيقي، وحب مصر للعرب حقيقي، واللي عايز يبوظ ده مش هنسمحله، اتحدوا يا مصريين علي قلب رجل واحد”.
