ياسمين عز عن حافلة المنتخب: قلقت على أولادنا يجيلهم ضربة شمس

قالت الإعلامية ياسمين عز: «رجاله منتخبنا وصلوا بالسلامة النهاردة إلى أرض الوطن واتعمل لهم أجمل استقبال شعبي في الدنيا والجماهير كانوا بيهتفوا باسم مصر وبيقولوا لللاعبين شكرا شرفتونا ورفعتوا اسم مصر في العالي حتى في الخسارة حصل فضيحة في الفساد والعالم كله عرف وده عشان يرضوا العيوطة ميسي وبعدين ركبوا اتوبيس مكشوف وصعبوا عليا عشان الشمس كانت حارقة وقلقت علىا ولادنا يجيلهم ضربه شمس وكنت بفكر إزاي ممكن يحموهم في الاتوبيس.. ليه محدش عمل برجوله خشب تحميهم أو شمسية معلقة حتى».

وأضافت، خلال حلقة اليوم من برنامج «كلام الناس» المذاع عبر شاشة إم بي سي مصر: « لكن بالرغم الشمس الحارقة ألاف المصريين كانوا منتظرين علشان يحيوهم على الإنجاز».

وتابعت: «في استقبال رسمي بكرة الرئيس عبد الفتاح السيسي بنفسه هيستقبل بكره لاعبي المنتخب والجهاز الفني والإداري بعد ما شرفونا في كاس العالم ومفيش أجمل من كده إن رئيس بلدك يستناك وسط بلدك ويكرمك وسط جمهورك.. وكان نفسنا نروح لأبعد لكن منه لله الحكم إن شاء الله يجي له ويحط عليه».

وقالت الإعلامية ياسمين عز: «مصر زعلانة والمصريين زعلانين والعالم كله زعلان بسبب اللي حصل في مباراة مصر والأرجنتين، زعلانين بس فخورين متكسبش بفخر أحسن ما تكسب بأكل الحرام زي ميسي واتفونتينو إحنا غيرنا اسمه ولغيناه خلاص». 

وأضافت: «خسرنا ظلم بسبب الحكم والفيفا والعنصرية انفنتينو وميسي اتحدوا ضدنا ولغولنا جول في مزاجهم وفي أقل من ربع ساعة خسرنا 3-2 بعد أجوال مشكوك في صحتها.. اللي زعلنا إننا كنا قربنا واتعشمنا لكن كان في أيادي خبيثة قررت تبوظ علينا الإنتصار والفرح لكن العالم كله وربنا قبلهم شاهد على سرقة الماتش وسجل يا تاريخ إن ميسي العيوطة عيط عشان إحنا كسبنا.. هو كتيبة المحترفين احتاجوا الحكم يبقى معاهم بالظلم عشان يكسب علينا متخيلين هما خايفين مننا إزاي.. ومن هنا ورايح المصريين هيشجعوا أي حد إلا ميسي أنا لو لعبت قدام ميسي هيشجعوني عادي وعايزين نشكر منتخبنا والرجاله اللي شرفونا ورفعوا رأس كل مصري شكرا يا محمد صلاح يا قائد يا عالمي يا مهنينا يا مفرحنا تسلم يا أبو مكه يا محترم ومردوده ليك في كتب كتاب مكة أو حنه كيان.. وكابتن مصطفى شوبير صغير السن كبير المقام شوبير باشا بيه شكرا يا حارس عملاق».