ياسمين عز تنصح السيدات: نسي جوزك الماتش وحطي روج نود يخلي الغايب يعود
وجهت الإعلامية ياسمين عز نصيحة للسيدات بعد خسارة منتخب مصر أمام الأرجنتين، قائلة: «حاولي تنسي جوزك الصدمة وخسارة مصر في ماتش الأرجنتين افتحي نفسه ودلعيه».
وأضافت ياسمين عز، خلال حلقة اليوم من برنامج «كلام الناس» المذاع عبر شاشة إم بي سي مصر: «خففي عن جوزك صدمة الخسارة حطي روج نود يخلي الغايب يعود، اسحبي سحبة أيلاينر صفية العمري، نسيه كورة مرموش وحطيله رموش».
وتابعت ياسمين عز: «أقولك حاجة جميلة اديله القايمة يقطعها واكتبي على نفسك وصولات أمانه أو دلعيه لو أحمد قوليله حمادة ولو عادل قوليله ياولا لكن لو عمر أوعي تقوليله يا مرموش هيقتلك».
وفي وقت أخر، وجهت الإعلامية ياسمين عز مجموعه من النصائح للزوجات المصريات من أجل مباراة مصر وإيران غدا في كأس العالم، قائلة: «هتلاقوا أجوازاتكم كلكم بتتفرج عليه فنصايحي ليكي أولا عايزة تفرحي جوزك فرحة العمر قبل الفجر خدي إسدالك ولمي عزالك ولمي عيالك سلاحف النينجا وروحي عند أهلك سيبيله البيت يتفرج براحته».
وأضافت، خلال تقديمها برنامج «كلام الناس» المذاع على قناة إم بي سي مصر، «لو عملتي اللي بقولك عليه أقسملك هيتبسط وهيدعيلك وهيفضل شايلهالك العمر كله أكتر من الشبكة اللي بعتيها عشانه مش بعيد ترجعي تلاقيه متجوز».
وتابعت: «أصلا بهزر معاكي جوزك ممعهوش فلوس يتجوز أصلا أخره يتفرج على ماتش أما ثانيا لو عايزة جوزك يقعد جمبك ويتفرج على الماتش وماينزلش الفجرية ادفعيله الاشتراك بيعي غويشة ولا اتنين من دهبك ولا بيعي دبلتك لو لسه موجودة أو بيعي حلقك الحمصه عشان تعمليله الاشتراك يقعد جمبك يتفرج تتونسي بيه ويتونس بيكي وأهو يلاقي حد يفش غله فيه لو المنتخب خسر لا قدر الله فالك في وشك».
وأوضحت: «ثالثا، لما الماتش يبقى الفجر انتي بتصحي من قبلها بساعتين في المطبخ تحضري التسالي والتحالي وتعبي الترمس أو إبريق الشاي والمكسرات والجوز واللوز وكتري من اللوز لو معندكيش لوز فهو قاعد جمبك مصدر شجرة اللوز الحلو المر ومتناميش عندنا شغل وعندنا كاس عالم قومي ورينا همتك».
