ياسمين عز: ابننا هيثم حسن مسح بلاعبي الأرجنتين الملعب رايح جاي

قالت الإعلامية ياسمين عز: «ميسي واتفنتينو، اه إحنا غيرنا اسمه، عملوا مؤامرة ضدنا.. واشهد يا تاريخ ميسي العيوطة وكتيبة المحترفين صحابه هيثم حسن ابننا كان ماسح بيهم نجيلة الملعب رايح جاي.. ده حكم ظالم مفتري مستقصدنا ويزعل لما نجيب رقمه ورقم مراته والمصريين يهزقوكم.. أحسنلك ماتخانقش تاني مع المصريين علشان إحنا زعلنا وأنا عرفت من مصادري الخاصة إنهم بعتوا لمارينا مراتك كل خصوصياتك على الوتساب اهي دي أخرة الأكل الحرام هما بعتوا كل الحاجات». 

وأضافت، خلال حلقة اليوم من برنامج «كلام الناس» المذاع عبر شاشة إم بي سي مصر: «منك لله حسبي الله ونعم الوكيل فيك يارب مراتك تطلب الطلاق واتفونتينو يقلب عليك واتفونتينو عليك.. في حاجات غريبة كمان في الملعب لم نسمع عنها من قبل، في لاعب أرجنتيني ضرب عاشور بالبوكس في وشه والحكم محسبش أي حاجة ولا قاله بس يا حبيبي العب مع صاحبك، ولا الراجل اللي ينط على محمد صلاح برجليه الاتنين الحكم محسبش إنذار مع إن ده في حقوق الغنسان بره الملعب يصنف عنف جسدي ما بالك بحقوق اللاعب اللي هي أكتر من حقوق الإنسان كان ممكن محمد صلاح يعمل له أحسن محضر هناك في القسم بس فخر العرب معملش كده».

وتابع: «إذا كان رئيس الفيفا خالك والحكم عمك قوله يابن عمي، لاعيبة الأرجنتين محدش فيهم خد إنذار وأحنا بيتوزع علينا إنذارات زي الملبس.. والجول اللي اتلغى حصلت اختها وبنت خالتها مع محمد صلاح ومحسبتهاش يا أعمي البصر والبصيرة يا افاق وأنت رفضت ترجع للفار واللي بيعترض بياخد إنذار حرام عليك.. إبننا بطنه بانت والتيشيرت انقطع وكان ممكن يجيله مغص ولاعب الأرجنتين مأخدش إنذار».

واختتمت: «قوه عين مشوفتهاش في حياتي وممكن كلامي ميعجبوش ويديني إنذار دلوقتي.. ده راجل صعب، حرام عليك نيمت رجالتنا كلها زعلانة لكن بإذن الله هتتعجن الماتش الجاي وهنقعد نشوف هالاند بيمسح بيكم نجيلة الملعب.. نيمت 130 مليون زعلانين، لأ 131 مليون أنا لوحدي مليون.. بطلب منكم أيها المشاهدين أجمعين تدعوا على الحكم الفرنسي اللعين وهنقول وراكم أمين».