ياسمين عز تحتفل بفوز مصر: لا صوت يعلو فوق صوت المنتخب

علقت الإعلامية ياسمين عز على فوز منتخب مصر على أستراليا، مؤكدة بحماس: «لا صوت يعلو فوق صوت منتخب مصر، فوز مصر على أستراليا، اكتب يا تاريخ عندك مصر صعدت لدور الـ16 في كاس العالم، مصر من أفضل 16 منتخب في العالم».

خطة منتخب مصر

وخلال تقديمها برنامج «كلام الناس» على قناة MBC مصر، أضافت بأسلوبها المعتاد: «أستراليا كانت بتدافع قدامنا وعمالة تشعلق الكورة في الهوا لكن لاعيبة المنتخب نفذت خطة سيبناهم ينطوا لفوق وعدينا احنا من تحت وكسبنا».

أستراليا جابت الجول ونامت عليه 

وتابعت: «هو دا إمام عاشور بتاعنا اللي جاب الجول، أستراليا جابت الجول ونامت عليه وقعدت تدافع، لاعبي المنتخب أعصابهم حديد، اي الجمال دا، السنة الجاية مش هنقبل بأقل من دوري أبطال إفريقيا، الاعيبة كلها كانت رجالة».

وقد وجهت الإعلامية ياسمين عز تحذير شديد اللهجة إلى المنتخب الاسترالي قبل مواجهة المنتخب المصري اليوم ضمن مباريات كأس العالم 2026، قائلة: «تحذير شديد اللهجة للاعبين منتخب استراليا حذاري ومليون حذاري تقربو من رجالة منتخبنا هتقولولي ليه عشان الفيفا لا مش عشان الفيفا عشان خاطري محدش يجي جمب حموزي عبد الكريم ده النابغة بتاعنا سيبوه يلعب سيبوه يرقص يستعرض مهاراته محدش يجي جمبه لو سمحتوا سيبوه عشان ينزلوله ريل حلو على صفحة برشلونة ونتفشخر بيه». 

وأضافت ياسمين عز، خلال تقديمها برنامج «كلام الناس» المذاع على قناة إم بي سي مصر: «عمر مرموش شرفوه يا جماعه قدام نسايبه الراجل لسه متجوز وكاتب كتابه ولسه متهناش ولا دخل دنيا سيبوه يلعب وسيبوه يلعب لوحده ويعمل اللي يعجبه». 

لا تعليق كفايه عليه كابتن حسام حسن

وتابعت: «بالنسبة لإمام عاشور لا تعليق كفايه عليه كابتن حسام حسن أما زيزو بليز محدش يغيظو هو طيوب ومش هيضايقكم ولا هيسجل عشان خاطركم سيبوه يا أشرار يمتعنا باللعبة ومحدش يعرقله أو يزعجه أما زيكو فبراحتكم بس محدش يزعل لما زيكو يعمل فيه زي ما عمل في أنتيمو وزقه على الأرض اكله النجيله تخيل عمل كده مع صاحبه الأنتيم فهيعمل فيك اي لو عصبته». 

وأوضحت: «أما محمد هاني بعد إذنكم ممكن منجريش الكابتن فوق طاقته وممكن ماننعكش شعره الكيرلي الجميل لأنه ده إبننا اللي بنحبه وهيفضل طول عمره في نظرنا اللاعب الناشئ».