«القمر بيغيب كتير».. نهلة سلامة ترد على ياسمين عز وتكشف سر شبابها: قلبي حلو

في لقطة خفيفة الظل أثارت تفاعلا واسعا، ردت الفنانة نهلة سلامة على سؤال الإعلامية ياسمين عز حول غيابها عن الساحة الفنية، قائلة بأسلوبها المعتاد: «معلش هو القمر كدا بيختفي.. أنا بعمل حاجة وبعدين باختفي وأنسى الفن وأسافر.. هو كدا الفنون جنون.. لكن أنا مش مختفية جامد أخر عمل ليا كان من سنتين».

وأضافت نهلة سلامة، خلال استضافتها في برنامج كلام الناس مع الإعلامية ياسمين عز المذاع عبر شاشة إم بي سي مصر، تعليقا لافتا عن سر الحفاظ على شبابها، مؤكدة: «قلبي حلو ودماغي فاضية»، في إشارة منها إلى أسلوبها البسيط في الحياة وابتعادها عن الضغوط.

وفي سياق الحلقة، قالت الإعلامية ياسمين عز: «النهارده إجازة، لو أنت قاعد دلوقتي على الكنبة بتتفرج عليَّا، ومفكر إن العمر جرى بيك وملحقتش تتجوز ولا تعمل عيلة، افتكر إن فيه راجل متجوز، في نفس اللحظة، قاعد على الكنبة زيك، ومراته مشغلة المكنسة جنبه، مزيكة حسب الله، وبتلف حواليه، وشوية وهتقعد جنبه تقوله: وريني تليفونك، ومين بعتتلك على الإنستجرام أول امبارح، وتفتش في التليفون، وده وضع أنت متحبش تكون فيه».

وأضافت، خلال حلقة اليوم من برنامج «كلام الناس» المذاع عبر شاشة إم بي سي مصر: «ده في الوقت اللي أنت قاعد فيه، فرعون زمانك أحمد ونساؤه 99، وعلى الطرف الآخر محمد زميلك بيتفتش في تليفونه كل ربع ساعة.. حب حياتك، ونادي على اللي عندك في البيت يجيبوا ليك حتة شيكولاتة أو جاتوه، أو يعملوا لك كوباية شاي تسكر بيها على قلبك المليان، لأن المتجوز مش لاقي معلقة نظيفة يقلب بيها كوباية الشاي، ده لو عندهم شاي أصلًا، لأن النهارده مش يوم إجازة في حياة الراجل، معندناش الكلام ده.. لا، ده يوم التنفيض العالمي بتاع شيماء، وتشغيل الغسالة، والسلاحف تتنطط حواليك، ويقولوا: هات يا بابا فلوس، عايزين إندومي وأقساط المدرسة، وفي الآخر يسألوك: أنت مبتقعدش معانا ليه وتخش تنام؟ ما هو من الهم اللي بيشوفه في الإجازة يا شيماء، هيقعد ليه يعني؟».