ريهام سعيد ترد على شكوى«حلقة الكلاب»: أنا ماشية بمنطق امشي عدل يحتار عدوك فيك
خرجت الإعلامية ريهام سعيد في بث مباشر لتوضيح موقفها بعد استدعائها لنقابة الإعلاميين على خلفية شكوى قدمت ضدها بسبب "حلقة الكلاب" في برنامجها.
وقالت ريهام سعيد: "أنا طالعة اللايف أشكر جمهوري وكل الناس اللي كانت قلقانة عليا.. أنا في الطريق راجعة من نقابة الإعلاميين وأنا من الناس المحظوظة جدا إن عندي 2 نقيب لأني عضوة في نقابة المهن التمثيلية والنقيب حبيب قلبي الدكتور أشرف زكي اللي ليه مواقف كتير جدا معايا.. ونقابة الإعلاميين كمان كل الاحترام والتقدير للدكتور أشرف سعدة لأن ليه مواقفه معايا ومع إعلاميين كبار وياما ساندنا ووقف جنبنا.. لكن هو دوره كنقيب لما تجيله شكوى يحقق فيها ويسأل الإعلاميين عن مدى صحتها".
وأوضحت أن سبب الاستدعاء كان شكوى من ضيفة في حلقة تناولت قضية الكلاب الضالة، مشيرة إلى أن الموضوع شائك وبه أطراف وآراء مختلفة، وأضافت: "في شكوى اتقدمت لما عملنا حلقة الكلاب علشان الموضوع شائك جدا وفيه أطراف كتير وفي آراء مختلفة وأكيد كان لازم يحدث جدل لكن مضمون الحلقة مكانش في حاجة.
وتابعت: وفكرة إن الضيفة راحت اشتكت في النقابة كان أسهل إن حضرتك تعترضي على إذاعة الحلقة ومتذيعهاش.. لو كانت بعتتلنا تاني يوم وقالت مش عايزة الحلقة تتذاع كنا هنعمل كدا لكن هي راحت اشتكت ومكانش ينفع منروحش النقابة إحنا تحت أمر النقابة وخصوصا أنتم عارفين عني إني بحترم القانون والنقابة أو المجلس أو النيابة هتندهلي هروح لأني ماشية صح وماشية بمنطق امشي عدل يحتار عدوك فيك.. أنا بحاول أراعي ربنا في شغلي وأكون مهنية".
الإعلام مدارس لكن ميثاق الشرف الإعلامي واحد
وأكدت ريهام أن ميثاق الشرف الإعلامي واحد وقوانين المجلس والنقابة واحدة، مقدمة الشكر لنقابة الإعلاميين لحفظ الشكوى، وتابعت: "الإعلام مدارس لكن ميثاق الشرف الإعلامي واحد وقوانين المجلس والنقابة واحدة وبشكر نقابة الإعلاميين بشدة إنها حفظت الشكوى وأنا وضحت إننا كان معانا طرفين، ناس عايزة تأكل الكلاب وعايزاهم في الشارع وناس عايزة قتل رحيم للكلاب وإحنا ولا كنا مع دول ولا دول.
وواصلت: احنا كنا مع القانون وهو بيقول عدم إيذاء الحيوانات ولا الحل إننا نتخانق في الشارع ونرش جاز على بعض لأن الحلقة كانت بتتكلم عن مشاجرة بين اتنين ومنهم واحدة كانت بترش جاز وده تصرف مش مقبول، أنا حيادية آه ومينفعش أقول وجهة نظر لكن أنا بقول اللي بيقوله الصح لأن أنا دوري توعوي".
واختتمت ريهام حديثها بالإعلان عن حلقة جديدة من برنامج "صبايا الخير"، قائلة: "النهاردة في حلقة قوية في صبايا الخير مع الرائعة مريم أمين وأنا بهدي ليها الحلقة دي وبباركلها على رجوعها ولكل الناس اللي في ماسبيرو، حلقتك المرة اللي فاتت ومداخلة شيريهان ووجود دعاء فاروق ومفيدة شيحة وسالي فاروق إعلامياتنا المحترمات كانوا تحفة وبحبك جدًا يا مريم ويارب الحلقة تعجبكم".
