تامر أمين يوجه رسالة لأولياء الأمور: تربية الأطفال أولوية
انتقد الإعلامي تامر أمين السيدة التي كانت تلقن ابنتها الإجابات في لجنة الامتحان، على طريقة فيلم اللمبي، قائلا: «الست بتقول لبنتها ركزي يابت.. يعني مش تركز في الأسئلة لا تركز في الإجابات اللي بتغششها ليها».
وأضاف، خلال حلقة اليوم من برنامج «آخر النهار» المذاع عبر شاشة النهار: «هو ولي الأمر ماله؟ يعني أنت عايز ابنك ينجح ولا يتعلم؟ يا فرحتك بيه وهو ناجح ومش مكلفك فلوس كتير لكن متخرج فاشل ولا متعلم ولا فاهم ما أنت كدا رميت فلوسك في الأرض».
وتابع: «أنت كدا طلعت إنسان حرامي لأن الغش ده.. أنتم بتربوا ولادكم على إيه أنجح وأكسب من الحرام.. لازم نحارب ده وده بيبدأ من البيت يااريت الأب والأم يرجعوا يشوفوا شغلهم وده مش معناه إنكم تشتغلوا.. لا معناه نرجع نربي، لو جوعتوهم وربتوهم أحسن من إنكم تشبعوهم وتبوظوهم».
وفي وقت سابق، علق الإعلامي تامر أمين عن الحديث المتداول حول أداء منتخب مصر، قائلا: «من بعد مباراة منتخب مصر مع البرازيل واللي بيحبوا يصطادوا في المية العكرة اشتغلوا، وأنا مش هقول أسماء عشان بيزعلوا مني، انتوا عارفين إني مبخافش، واللي يقول يقول، الناس بتقولي بلاش يا تامر عشان متعملش سجال شخصي».
مش وقت محاسبة المنتخب
وأضاف، خلال تقديم برنامج «آخر النهار»، المذاع على قناة «النهار»: «الحقيقة في ناس بجد تضايق، لما تبقى بعض المحليين والكباتن طالعين خلال اليومين دول اللي هو المفروض نبقى ورا منتخبنا وبندعمهم وبندعيلهم وحتى لو احنا بعنينا شايفين مشاكل أو أخطاء أكيد دا مش وقت المحاسبة».
المحاسبة تأتي بعد الأداء
وتابع: «المحاسبة تيجي بعد الأداء يعني بعد النهاية مش قبل ضربة البداية، عمرك شوفت حد بيحاسب قبل الامتحان؟، الحقيقة الكلام اللي أنا سمعته على مدار اليومين اللي فاتوا من بعض المحللين المعروفين بالاسم اللي بيفضلوا الشهرة والتريند وإنه يعمل فلفل شطة على حساب أي حاجة سواء اسم بلده أو الفتنة اللي ممكن يعملها بين الأهلي والزمالك».
أرجو إن الناس متبتلعش هذا الطعم
واختتم: «همهم الوحيد إن يبقى عندهم تريند وعندي فولورز، والناس في القنوات بيجبوني ولما أعمل فيديو على السوشيال ميديا يكسر الدنيا، وأرجو إن الناس متبتلعش هذا الطعم وتنبذ هذه الأفكار والأصوات الشاذة، دا مش وقت محاسبة ولا وقت تقطيع دا وقت دعم والمحاسبة تيجي في وقتها بعد اكتمال المشوار، نقعد نشوف كسبنا اي وخسرنا اي، دا الاحترام والإعلام والانتماء للبلد».
